USENZO "Ntencane" Zondi, uqophe umlando ngokuba wumculi wokuqala kamaskandi ukubhidisa emqhudelwaneni wamakhwaya kuMzansi Magic, iClash of the Choirs.
UNtencane owazakhela udumo ngokuhlukanisa unyaka kuKhozi FM ngengoma ethi Wawuthembeni ngo-2019, uzodlana imilala nabaculi abanjengoPrince Kaybee, Lady Du, Vusi Nova noHle. Uthe waqala wanqaba ukubamba iqhaza kulo mqhudelwano ngenxa yokuthi kwakuyinto ayengayiqondi ukuthi yenzeka kanjani.
"Kwaze kwaba bayangichazela kahle ukuthi yinto ekanjani, ngabe sengiyayemukela inselelo yabo ngoba umculo yinto engiphila ngayo futhi zikhona ezinye izinto engizaziyo ngomculo ngaphandle kokucula umaskandi."
Uthe kusho lukhulu kuye ukubamba iqhaza kulo mncintiswano ngenxa yomlando wawo ngabantu asebeke baba yingxenye yawo. UNtencane uthe kube yinhlanhla ukuthi akwazi ukukhetha isifundazwe adabuka kuso iKwaZulu-Natal.
"Yingoba ninikezwa amaphepha ebhekiswe phansi bese bethi khetha iphepha libheke phansi. Uma sewulithintile bayaliphendula bese kuvela isifundazwe osikhethile. Ngenhlanhla mina ngikhethe iKZN."
Uthe uselikhethile ithimba labaculi azokwakha ngalo ikhwaya ezomela iKwaZulu-Natal emzuliswaneni wamanqamu ozokuba seGoli phakathi kukaSepthemba.
Isolezwe Ngempelasonto lithole ukuthi inhlolokhono beyisePlayhouse, eThekwini, ngo-Agasti 15 no-16, kanti lolu hlelo luzoqala ukukhonjiswa kuMzansi Magic ngoSepthemba 24, kusukela ngo-6 ntambama.
Ikhwaya ezodla umhlanganiso kulo nyaka izokhala yemuke nesamba sikaR1 million nomnikelo ezowudlulisela enhlanganweni engenzi nzuzo ezokhethwa yiyo. Umculi wokholo futhi ongumsakazi weGagasi FM, uKhaya Mthethwa, nguye owazibula ngalo mqhudelwano ngekhwaya eyayimele iKZN.
Amanye amalungu aleyo khwaya agcina esecula kwiJoyous Celebration nasohlelweni ebelwethulwa nguKhaya kuMzansi Magic iGospel Avenue.