Kaizer Chiefs (1) 2
Stellenbosch FC (1) 1
IKaizer Chiefs iziphe isipho samaphuzu amathathu ngokunqoba iStellenbosch FC ngo 2-1 emdlalweni weBetway Premiership obuseFNB Stadium, eNasrec, ngoLwesithathu ebusuku.
Leli qembu elasungulwa ngoJanuwari 7 ngo-1970, beligubha iminyaka engu-55 ngoLwesibili, lajabulisa abalandeli ngokubuya selilandela ngemuva.
IStellies ihambe phambili ngegoli elishaywe nguKhomotjo Lekoloane esiwombeni sokuqala, Amakhosi aphendula ngamagoli ashaywe nguWandile Duba ngokwehlukana kweziwombe.
IChiefs ibibheke ukuvuka kulandela ukuguqiswa yiCape Town City ngo 1-0 kowakamuva weligi, kanti iStellies yagcina ibambane ngo 1-1 neSuperSport United.
UBradley Cross umoshe ithuba lokubeka phambili iqembu likaNasreddine Nabi ngomzuzu wesihlanu kodwa wakha amabhilidi esebhekene nepali.
Ukuhluleka kukaCross noDitlhokwe ukukhipha ibhola emuva ngomzuzu ka-20 kuholele ekutheni iStellies sithole igoli. UJayden Adams uthole uDevin Titus kwesokudlala ebhokisini, waligobela uLekoloane, olinamathisele enethini.
Nokho, kuthathe imizuzu eyisishiyagalombili ukuthi iqembu lasePhefeni lithole igoli lokulinganisa. Ikhona kaMduduzi Shabalala ingqomfwe uDitlhokwe, uDuba walibeka enethini ngekhanda.
UNabi wenze izinguquko ezimbili ngomzuzu ka-30, efaka uTebogo Potsane noMfundo Vilakazi ezindaweni zikaCross no-Ashley du Preez kodwa kuyiwe ekhefini zisabambene ngo 1-1.
Amakhosi agadle kuqala esiwombeni sesibili ngomzuzu ka-57 ngephasi enhle ka Vilakazi ekhulule uDuba ngakwesokudla, washaya ishodi alizwe ngendaba unozinti weStellies, uSage Stephens.
Kwale kancane ukuthi ezikaSteve Barker zilinganise ngomzuzu olandelayo, kwasebenza uBruce Bvuma, ephebeza ibhola ebelithunyelwe ngu-Ibraheem Jabaar.
UBarker wenze izinguquko ezinhlanu maphakathi kwesiwombe sesibili ezama ukuthola igoli lokulinganisa.
IStellies sicishe yalithola ngomzuzu ka-90 kodwa ibhola likaSanele Barns lishaye ipali, kwathi intambo ebidonswe nguKazie Godswill yavinjwa nguBvuma, iChiefs yemuka namaphuzu agcwele.
Lo mphumela ukhuphule Amakhosi wawabeka endaweni yesihlanu ngamaphuzu angu-18 emidlalweni engu-12, iStellies yehlela endaweni yesikhombisa ngamaphuzu angu-16 emidlalweni engu-11.
Kweminye imidlalo yeBetway Premiership, iCape Town City iqumbe phansi i-Orlando Pirates ngo 1-0 ngegoli elishaywe nguDarwin Gonzalez ngomzuzu ka-74. ISekhukhune United iguqise AmaZulu FC ngo 2-0 wamagoli ka-Andy Boyeli ngomzuzu ka-45 nelikaLinda Mntambo ngoka-90.