UMLINGISI weMbewu The Seed, uKhaya Ngema, uphume umkhankaso wokufukula abafundi baka-matric ngemidlalo yeshashalazi esuselwe ezincwadini ezifundwa kuleli banga. UKhaya weKhayalamangema Artists Productions usephonsele abafundi nothisha ukuba bafike ngobuningi babo kwi-Education Theatre Festival lapho ezobe ekhombisa khona imidlalo yeshashalazi esuselwe encwadini esihloko sithi My Children My Africa, Impi Yabomdabu Isethunjini nethi Ubhuku Lwamanqe. Uthe kuzobuye kudlalwe nesuselwe ezindabeni ezimfushane ezisuselwe ezincwadini zesiNgisi okubalwa kuzo ethi Class Act, The Girl Who Can nethi Triumph of The Face of Adversity.
Lolu chungechunge lwedili lemidlalo yeshashalazi luzobe lwehla lwenyuka emahholo omphakathi waKwaZulu-Natal.
"Ngiyacela ninganqikazi ukubekisa indawo ngenxa yokuthi abafundi bethu benomdlandla wokubuka kunokufunda. Bayakhuthazeka ukufunda izincwadi emuva kokubuka umdlalo njengoba kwenzeka ezinkundleni zokuxhumana ezifana noTikTok, Instagram noYouTube. UKhaya uthe lolu chungechunge lwemidlalo luzoqala eBat Centre, eThekwini ngoJanuwari 27 kuya kuFebhuwari 3, ludlulele e-Escourt Forestville Hall ngoFebhuwari 6 no7, luqhubekele eWinterton Hall ngoFebhuwari 8 no9, Ladysmith Civic Hall ngoFebhuwari 10, eShowe Sunnydale Hall ngoFebhuwari 13, oLundi Multi-Purpose Centre ngoFebhuwari 14 no15, kwaNongoma Multi-Purpose Hall ngoFebhuwari 16 no17, eNquthu VA Makhoba Hall ngoFebhuwari 20 no21, eNewcastle RichviewHall ngoFebhuwari 22, 23 no24, ePietermaritzburg Grange Hall ngoFebhuwari 27 no28, eBulwer Arts Centre ngoMashi 1 no2, eXobho Town Hall ngoMashi 3, eMtubatuba Nordale Hall ngoMashi 6 no7 nasoPhongolo Ncotshane Hall ngoMashi 8 no9. UKhaya uthe lezi zinsuku zihlelelwe ithemu yokuqala kuphela.
Uchaze lemidlalo njengedlala enkulu indima ekukhuthazeni nasekujabuliseni abafundi nothisha.
"Lolu hlelo lwaqala kusukela ngo-2006 ngemidlalo eyayisuselwe ezincwadini okubalwa kuzo ezazithi Animal Farm, When Rain Clouds Gather, Sounding Wings, Umthathe Uzala Umlotha, Ngicela Uxolo, Nothing But The Truth nezinye. UKhaya, ongumdidiyeli nomqondisi wale midlalo yiciko eselimnkantshubomvu eligabe ngoxhaxha lwamakhono okubalwa kuwo elokulingisa nelokuhlekisa. Nyakenye uKhaya uhlabane ngomklomelo weFilm Award kuma- African Emerging Film Awards. Ubuye wakhala wemuka nendondo yeBest Actor, Best Director neyeBest Screenplay. Waziwa kakhulu ngendawo kaLungelo Zulu abeyilingisa kwiMbewu The Seed.
Unxuse bonke abafundi nothisha abazimesele ukubukela imidlalo yakhe ukuba babekise indawo ngokufonela ku-083 4757 032.