UNGENE ekulingiseni umndeni wakhe ungafuni, uBhekisizwe Mahlawe (31) odlala indawo yokuba ngumhlengikazi uCalvin Gumede kwiDurban Gen.
UBhekisizwe uthe phezu kokuba umndeni wakhe umeseka manje emsebenzini wakhe wokulingisa, kodwa akekho obekholwa kubo ukuthi angaba nekusasa emkhakheni asekuwo. Kunalokho uthi babephoqa ukuthi=-akayofundela ukuba wuthisha, okuyinto agcina eyibalekele ngoba ethanda ukulingisa.
“Ngakithi eMzimkhulu ngibe ngowokuqala ukuba wumlingisi ovelelayo, engicabanga ukuthi yikhona okwenza umndeni wami usabe ukuthi ngingaphumelela kukhona ngoba akekho umuntu obekubukelwa kuyena, ophumelele kukhona. Ngesikhathi ngikuveza ukuthi ngifuna ukuba ngumlingisi, wangiphoqa ukuthi ngiye kofundela ubuthisha e-Unisa. Nami ngagcina ngibhalisele bona ubuthisha kodwa ngabushiya emva kwezinyanga eziyisithupha, ngalandela iphupho lami lokuba ngumlingisi. Sengiyeke ukufunda ngiqale ukuya ezindaweni lapho kunenhlolokhono khona, ngibe ngibamba netoho eProtea Hotel eThekwini. Ngesikhathi izinto ziqala ukugqama ngo-2010 emva kokuthathwa ukuthi ngibe wumlingisi wemidlalo yeshashalazi, senza imidlalo yoMnyango wezokuVakasha, ngivele ngagxila ekulingiseni,” kusho uBhekisizwe.
Uthe naseProtea Hotel wagcina ethathe isinqumo sokuyeka ngenxa yokulingisa, waze waya eGoli.
“Ngifike eGoli izinto zangahamba kahle kodwa ngilokhu ngizama imisebenzi. Nangesikhathi ngiseGoli ekhaya ngangingashilo. Kwaze kwaba nomdlalo wethelevishini weKasi Stories engavela kuwona, bangibona ekhaya. Yilapho ngaphumela khona obala ngasho ukuthi sengiyalingisa, ngakuyeka ukufundela ubuthisha,” kuqhuba yena.
Uthe uqale wathola indawo emfishane emidlalweni eyahlukene, okuyiSoul City, Sokhulu & Partners, Rythm City, Isithembiso, Isidingo neminye. Izinto uthe ziqale ukugqama eselingisa indawo kaTebza kwiGenerations: The Legacy. Uthe wayefike kulo mdlalo ethenjiswe ukuthi uzoshutha iziqephu ezimbili kuphela kodwa bazoyithanda indawo yakhe, wagcina esehlale kuyona iminyaka emine. Uthe obekwenza akwazi ukuzidayisa ngezindawo azilingisayo, wukuthi wayeseke wangena nasesikhungweni sikaDuma Ndlovu lapho aqeqeshelwa khona ukulingisa.
IDurban Gen, uthe imthole nyakenye esenezinyanga ezine aphuma kwiGenerations: The Legacy. Nakhona uthe wayesaba ukuya kwinhlokhono ngoba wayeseke wanqaba ukuyolingisa kwiHostela emva kokuthi imenenja yakhe ingavumanga ayolingisa khona esethathiwe. Ngenhlanhla uthe kwiDurban Gen bamthanda, wathola indawo yomhlengikazi ayilingisa manje.
Ngaphandle kokulingisa, uBhekisizwe unelebuli yakhe yezimpahla zokugqoka ebizwa ngokuthi uMzimcool neziqholo zasemakhwapheni. Ubuye abe nenkampani yakhe ayisebenzisa ukuhlelela osaziwayo imicimbi, iBorrowed Time Media.
Ekulingiseni uthe unesifiso sokuthi alingise indawo yokuba wusomabhizinisi, uma kwenzeka ethola omunye umsebenzi. Uthe eyokuba yisigebengu useyilingise kakhulu waphinda wathola eyokuba ngumhlengikazi.