Omakadebona babalingisi bakuleli, uConnie Ferguson, Connie Chiume noMasasa Mbangeni, bazobonakala efilimini evutshelwe kuleli esihloko sithi Heart of A Hunter.
Kule filimu, ezokhonjiswa kwiNetflix ngo-Ephreli, uConnie Ferguson uzobe elingisa indawo kaMolegang Kwena, uMasasa edlala ekaMalime Mambi, uConnie Chiume elingisa ekaThandiwe Makeba.
UConnie Ferguson (53), odabuka eBotswana, uzakhele udumo enguKarabo Moroka kwiGenerations The Legacy nangendawo kaHarriet Khoza kwiThe Queen.
UMasasa (36), odabuka eGqeberha, yena waziwa ngekaThembeka Shezi kwiScandal! kanti uConnie Chiume (71) waseWelkom usanda kushiya abantu bengawuvali umlomo ngendawo kaSonto abeyidlala kwiGomora.
Ngokusho kwesizindalwazi senkampani ekhiqiza le filimu, IMDb, iHeart of A Hunter isuselwe encwadini eyinoveli yombhali ohlonishwa umhlaba wonke, uDeon Meyer, kodwa yaqondiswa wuMandla Dube.
AbeNetflix bathe lezi zintokazi zilingisa noBonko Khoza onguZuko Khumalo, uSisanda Henna onguDaza Mtima, uNicole Fortuin onguNaledi Gumede, uBaleng Mogotsi onguPhakamile Mambi nabanye abaningi.