UMLINGISI wodumo kwiDurban Gen, uNombulelo Mhlongo, ukhale wemuka nezindondo okubalwa eye-Best Supporting Actress- Southern/Eastern Africa ne-Best Actress-Africa kumaZikomo Africa Awards eLusaka, eZambia.
UNombulelo (31) wasoPhongolo futhi obelingisa indawo kaSne Mtshali kwiDurban Gen, uthe akazi engabonga athini kubantu abamvotele kulo mqhudelwano wamaciko ase-Afrika.
Uthe ubeqokwe eminxeni emine, wahlabana nezindondo okubalwa kuzo i-Inspirational Woman of the Year neBest Supporting Actress.
"Ngiyabonga ngamavoti nokwesekwa wumndeni," usho kanje.
KwiBest Actress of the Year-Africa, uNombulelo uqumbe phansi uNgele Ramulondi, Thando Thabethe, Ziya Zulu, Gista Warsuki, Noele Ramulondi baseNingizimu Afrika nabanye bakwamanye amazwe kanti kwi-Best Actress Of The Year Southern/Eastern Africa, uhlulwe uThabsile Zikhali, Ama Qamata, Rosemary Zimu, Ngele Ramulondi nabanye bakwamanye amazwe.
AbamaZikomo Africa Awards bathe okuwinise uNombulelo ukuzimisela nokusebenza ngokuzikhandla ekuthuthukiseni ikhono lakhe lokulingisa. UNombulelo uthe uzobonakala emdlalweni omusha ozokhonjiswa kwiNetflix kodwa esisagodliwe isihloko sawo.
UNombulelo uqale ukuduma kuleli ngokudlala indawo kaNomcebo kuZalo emuva kokuba uCassandra Masemola kwiSkeem Saam nakwiFalakhe. Ufundele ukulingisa esikhungweni saseLos Angeles, e-United States of America (USA), ngo-2010.