USOMAHLAYA owethula uhlelo lwasekuseni kwiGagasi FM, uFelix Hlophe, uthole amadlelo aluhlaza emdlalweni wamahlaya ozokhonjiswa kwiShowmax, i-Ekhaya Backpackers.
IsolezweNgempelasonto lithole ukuthi uFelix, owethula iThe Uprising, uzobe elingisa indawo kaMalume Mayor. Izindaba ziqinisekiswe yisitatimende esithunyelelwe abezindaba ngabeShowmax.
Akukhona okokuqala uFelix ebonakala emidlalweni yethelevishini njengoba esebuya nakwiQueen Sono.
Imizamo yokuthola ukuphawula kukaFelix, osebuya kwiSaturday Showdown kuMzansi Magic, ayiphumelelanga kwaze kwashaya isikhathi sokushicilela.
Lo msakazi, oseke waqokwa kumaSatma Awards nakumaDStv Viewer's Choice Awards, uzobe edlala noKwenzo Ngcobo obenguQhawe Zulu kwiThe Wife, uBonko Khoza obenguMqhele Zulu kwiThe Wife, uThobani Mbhele, u-Eve Rasimeni, uMmonye Kunupi nabanye.
Umdlalo ukhuluma ngomndeni wakwaMthembu ohlela ukuphendula ikhaya lawo ihostela ukuze ukhokhele isikweletu sikamama ongasekho.
Emndenini kunezinsizwa zakhona ezigula ngamakhanda, umama wengane onomdumakhanda, ugogo nomalume. UKwenzo ulingisa indawo kaJabu, osemncane nobehlala phesheya kwezilwandle kodwa obuya engenamali.
UThobani, osebuya kwiGenerations neS'thunzi, uzolingisa indawo kaPapi, okungubhuti omdala emndenini. Yize uJabu noPapi beyinkukhu nempaka kodwa bahlanganiswa ukufuna ukugcina umlando kanina.
U-Eve ulingisa indawo kanina wengane kaPapi, uMadibuseng no-Abdul Khoza onguClarens kanti uMmonye udlala indawo kagogo kaJabu, noPapi.
Oyinhloko yemidlalo ebhaliwe uTebogo Matlawa, uthe bajabule kakhulu ngokulethela ababukeli beShowmax umdlalo wamahlaya.
"I-Ekhaya Backpackers isinikeza ithuba lokuzihlekela nokuthi izithameli zihambisane nezinye izigameko ezehlela abalingisi," kuchaza uTebogo.
Lo mdlalo uzoqala ukukhonjiswa kwiShowmax kusukela ngoLwesine.