KUQINISIWE uma kuthiwa ingoma emnandi iyaphindwa njengoba ingqalabutho yomsakazi woKhozi FM isinempinda yencwadi ekhuluma ngempilo yayo.
NgoLwesihlanu kuphume incwadi yesibili ekhuluma ngempilo kaDudu Khoza ebhalwe nguSlindile Khanyile.
Le ngqalabutho eshayela uhlelo, iJabulujule, olungena ngo-9 kuya ku-12 emini, nesiqede iminyaka engaphezu kuka-15 isemsakazweni isiphinde yabhalelwa incwadi yesibili exoxa ngempilo yayo.
Ebhala ekhasini lakhe le-Instagram, lo msakazi ubhale ukuthi: ‘Kuyintokozo kimina ukuba yingxenye yale ngqophamlando yokuthi iNingizimu Afrika igubhe iminyaka engu-100 sinomsakazo. Kuyinjabulo ukuthi ngibe yingxenye yalo mlando onothe kangaka. Yingakho ngikhethe ukuthi ngazise nabanye ngohambo lwami kule ndima yomsakazo kule ncwadi entsha ethi Longevity,’
Uthe kule ncwadi ukhuluma ngokusuka kwakhe ekubeni nguSister Mildred aze abizwe ngoLady D, Isiphithiphithi soKhozi noSister Benjy.
Phakathi kwezingosi esezimakhe ugazi kubalaleli boKhozi kubalwa Emajukujukwini (“Amajukujuku”), neChiller’s Conner (AmaChillers) egxile kakhulu ekuthuthukiseni abesifazane basemakhaya.
Ekhuluma naleli phephanda umbhali wencwadi, uSlindile Khanyile, owayenguMhleli omkhulu weSolezwe, uthe selokhu afikelwa umcabango wokubhala ngoDudu Khoza ngo-2018.
“Ekuqaleni ngangithi yinto elula njengokubhala udaba ephepheni kodwa kwagcina kungithatha isikhathi ngoba bekungeyona into encane ukubhala ngempilo yomuntu onomlando onothe njengowakhe,” usho kanje.
Incwadi iyatholakala ngo-R320 kanti uthembise ukuthi abantu abazoba senhlanhleni yokuyifunda bazombuleleka ngokuningi okuthinta uhambo lukaDudu Khoza kwezemisakazo.
Eyokuqala incwadi eyayethiwe ngokuthi Umabizwa Asabele yabhalwa uMnuz Velaphi "VVO" Mkhize kanti yaphuma ngo-2019.