UMPHATHI weGagasi FM, uMinenhle Dlamini, uthi bayazigqaja ngethalente laseKwaZulu-Natal, futhi yingakho beliqhakambisa.
UMinenhle ukusho lokhu ngoLwesibili ebusuku eLuma Sunset, eThekwini, lapho bekwethulwa khona izinguquko ezenziwe ezinhlelweni zesiteshi nezizoqala ngoMeyi. Uthe sebenikeze abaculi basesifundazweni inkundla yokuqhakaza kanjalo nabasakazi.
“Inhloso yethu ukuthola ithalente bese siyalikhulisa, silenze libe yinto enkulu nengcono,” kusho uMinenhle.
Uthe ngesikhathi behlanganisa uhla lwezinhlelo babheke izinto ezehlukene futhi akubanga wumsebenzi olula.
“Kube nemihlangano eminingi nokuphikisana. Sibheke nocwaningo lwethu ukuthi luthini. Kube kuningi esikubhekile,” kuchaza uMinenhle.
“Isinamuva liyabukwa ngoba ezinye iziteshi sezizimemezelile izinguquko zazo futhi nabasakazi sebeqala ukuzinza ezinhlelweni zabo ezintsha. Nalo-ke iGagasi lifika ekugcineni, liqhamuka selizoba ngamasinamuva abukwayo.”
Lesi siteshi siqashe abasakazi abasha okubalwa noPenny Ntuli, oke wafaka ividiyo ezinkundleni zokuxhumana esakaza emotweni esho ukuthi ufuna ukujoyina lesi siteshi. Uzokwethula uhlelo Ziyakhala ngo-1 kuya ku-4 ekuseni ngoMgqibelo nangeSonto.
Omunye nguSizwe Sibisi obekwiVibe FM, uzokwethula uhlelo iWeekends with Sizwe ngo-10 kuya ku-1 ekuseni ngoLwesihlanu kuya ngeSonto. Uhla lwango-6 ekuseni kuya ku-6 ntambama lumi njengokubika kweSolezwe ngoMsombuluko.
Ngo-6 kuya ku-9 ekuseni kuzoqhubeka uFelix Hlophe noNjabs Zwane, ngo-9 kuya ku-12 emini nguNomfundo Clarissa noKhulekani Mbambo, ngo-12 kuya ku-3 nguDJ Sonic noFlymotion, kuthi ngo-3 kuya ku-6 kusihlwa kube nguZisto, Heazy noKhaya Dladla abavala isikhala sikaDJ Warras noNomalanga Shozi abangasabuyi.
Omunye ongasabuyi nguHope Mbhele, oseyosebenza kwiMetro FM. Isikhala sakhe ohlelweni iBreakfast Gang Gang noSphe Live ngoMgqibelo ekuseni, sivalwe ngu-Asante Chiliza. Kolunye uhlelo abelwenza noSphe iSunday Chillzone ngo-2 emini, nakhona kufakwe u-Asante.