ABAHLALA eMlaza nakwaMashu, bazothola ithuba eliyingqayizivele lokubona isiqephu sokuqala somdlalo Ushaka-Ilembe, njengoba abalingisi balo mdlalo bezovakashela eThekwini.
Namhlanje abalingisi balo mdlalo bazobonakala enxanxatheleni yezitolo, iMega City, eMlaza bekhuthaza abantu ukuthi babuke lo mdalo.
Kuzothi kusasa badlulele KwaMashu esiteshini lapho bezophinde bahlangane khona nabalandeli babo, bese bejabulela isiqephu salo mdlalo.
UPortia Hlongwane weMzansi Magic uveze ukuthi abalingisi okukhona kubo uNtando Zondi bakubalingisi abazobonakala kulo mdlalo.
“Siyanxusa ukuthi baphume ngobuningi babo bazobona okuzobe kwenzeka kulo mdlalo, baphinde bajabulele nokuhlangana nosaziwayo abahlukene abazobonakala kulo mdlalo. Zihuba sakusha manje ngakho sibone kungcono ukuthi sihambele eKZN ngaphambi kokuthi umdlalo uqale ukukhonjiswa kwithelevishini ngoJuni 18,” kusho uPortia.
Uveze ukuthi ngeke akuqinisekise ukuthi obani abanye abalingisi balo mdlalo abazobonakala, njengoba bebaningi futhi bengeke babalethe bonke.
“Abantu abaqinisekise ukuthi kuyoshaya ihora lokuqala emini sebekhona ezindaweni esizimemezele. Siyathembisa ukuthi siyobashiya nemiklomelo eminingi ezobakhumbuza okuningi ngalo mdlalo noma usudlulile,” kuchaza yena.
Lo mdlalo oqoshwe eGoli naseShowe kulindeleke ukuthi kuwo kubonakale abalingisi okukhona kubo uNomzamo Mbatha, Thandeka Dawn King, Wiseman Mncube, Thembinkosi Mthembu nabanye.