ABALINGISI okukhona kubona umsakazi woKhozi FM, uZimiphi “Zimdollar” Biyela obelingisa indawo kaMatron Nkabinde, Mike Ndlangamandla (Dkt Lindelani Zulu), Duduzile Ngcobo (Dkt Nomalanga Qwabe), bangabanye babalingisi osekuvele ukuthi ngeke besabonakala emdlalweni iDurban Gen.
Lokhu kuvele ngemuva kokuthi abe-e.tv bememezele izindaba zokuthi kuqale isizini yesibili yalo mdlalo.
Isizini eqale ngoMsombuluko, kulindeleke ukuthi iphele ngoMashi noma ngo-Ephreli wangonyaka ozayo. Lo mdlalo bekumele ufinyelele emaphethelweni kulo nyaka kodwa lokho ngeke kusenzeka.
UNomfundo Zondi okhulumela inkampani iStained Glass, uveze ukuthi abanye babalingisi bazophinde babonakale kulo mdlalo.
“Isizini entsha iza nezinguquko ezinqala. Singasho kodwa ukuthi izinguquko ezibonakale ngoMsombuluko, yizona ezizoqhubela lo mdlalo phambili. Abalingisi engingasho ukuthi ngeke besabonakala manje yibona oZimiphi, uLindelani nabanye.
“Kukhona nabanye abasha abathathu abazobonakala kodwa sizobamemezela ekuhambeni kwesikhathi njengoba ukulingisa bengakaqali kodwa esingakuveza nje wukuthi lo mdlalo uzoshuba njengoba kuza umbulali ozobulala kwasani kube khona ingcindezi esibhedlela” kusho uNomfundo.
Uthe okwamanje ngeke banabe ngezizathu eziholele ekutheni lo mdlalo ululwe ukuze uphele ngonyaka ozayo.
Esitatimendeni esithunyelelwe abezindaba, baveze ukuthi abalingisi abafana noDkt Mbali Mthethwa (Neliswa Sibiya) bazobonakala sebengodokotela futhi kwenzeka lokhu uzobe esanda kuphuma ephehlweni.
"Izinkinga ezithinta ukuba wudokotela wesintu kanjalo nowesimanje yizona ezizoletha izingqinamba empilweni kaDkt Mthethwa. Izinto ezithinta ezothando zizoqhubeka nokuba yingqikithi yalo mdlalo. UDkt Thabo (Meshack Mavuso) noDkt Zondo (Fanele Ntuli) manje sebeshadile. UDkt Jack noCalvin nabo sebethathe elinye igxathu empilweni yabo njengoba sebethembisene umshado. UPhumeza usengu-matron kanti benomyeni wakhe uSibiya, sebenezingane ezimbili,” kuveza isitatimende.