OWAYENGUNOZINTI waMaZulu FC, uTapuwa Kapini, ushaya amakhala ngoFiacre Ntwari, osanda kusayiniswa yiKaizer Chiefs.
UNtwari (24) waseRwanda obedlalela iTS Galaxy, usayine kuMakhosi ngesonto eledlule. Izindaba zokusayina kwakhe ziqinisekiswe ngusihlalo weGalaxy, uTim Sukazi. IChiefs kulindeleke ukuthi imemezele ngokusemthethweni ukusayina kukaNtwari kuleli sonto ngaphambi kokuyodlala umdlalo weToyota Cup neYoung Africans SC yaseTanzania eBloemfontein, ngeSonto, ngo-3 ntambama. Omunye umdlali okulindeleke ukuthi amenyezelwe yiChiefs, nguBongani Sam obedlala kwiMoroka Swallows ngesizini edlule.
UKapini waseZimbabwe, odlale emaqenjini ahlukene kwiDStv Premiership, ubona iChiefs ishaye isikhala ngoNtwari. Le nsephe, ephanyeke amakhokho emgibeni isidlalela iHighlands Park, isiqashwe njengomqeqeshi wonozinti eqenjini leDStv Diski Challenge leSekhukhune United.
“UNtwari akekho ezingeni leKaizer Chiefs. Sekunesikhathi ngimbuka uma edlala. IChiefs yenze elikhulu iphutha ngokusayinisa yena. Ngasho okufanayo ngo-Ovono (Felipe) ngesikhathi esayina kwi-Orlando Pirates, wagcina engaphumelelanga. Kwenzeka okufanayo ngo-Ofori (Richard) esuka kwiMaritzburg United ejoyina iPirates. UNtwari akayazi ingcindezi yokudlalela iqembu elikhulu. Ngisho eqenjini lesizwe laseRwanda, ubani onendaba uma behlulwa ngo 5-0. IChiefs bekufanele ithathe unozinti weChippa, uStanley Nwabali ngoba uyayazi ingcindezi yokudlalela iqembu lesizwe laseNigeria,” kusho uKapini.
UNtwari ngunozinti wesithathu wangaphandle osayine kwiChiefs selokhu kwasungulwa iPremier Soccer League (PSL) ngo-1996. Ulandela ezinyathelweni zikaVirgil Vries waseNamibia noDaniel Akpeyi waseNigeria, abahambe sebenuka iqaqa kubalandeli baMakhosi. Kuzofanele azame ukuhlwitha ijezi kuBruce Bvuma noBrandon Peterson.
“Uma ungunozinti wangaphandle, akufanele uhlale ebhentshini. Kodwa lokho kubukeka kuzokwenzeka kuNtwari. Ngesikhathi nami ngifika eNingizimu Afrika, ngangazi ukuthi njengonozinti wangaphandle kufanele ngilidle ijezi. Kodwa okubalulekile wukulazi izinga lakho. Kumele uzazi ukuthi ungalunga kuliphi iqembu, ungayi ngokuthi liyakufuna.
“Uma ufika kwiChiefs, uqhathaniswa nonozinti abahlukene okukhona kubona u-Itumeleng Khune, Rowen Fernandez noBrilliant Khuzwayo. Uma ufika kwiSundowns kufanele ufinyelele ezingeni likaDennis Onyango noKennedy Mweene. KwiPirates uqhathaniswa noMoneed Josephs, William Okpara noSenzo Meyiwa. Izinga likaNtwari liphansi ukuthi engadlela iKaizer Chiefs,” kusho uKapini.