UKHOLWA wukuthi ingabuyekezwa indlela ehlelwe ngayo imidlalo ye-Investec Champions Cup ukuze ingawathikamezi kakhulu amaqembu umqeqeshi weHollywoodbets Sharks, uJohn Plumtree.
Iqembu likaPlumtree lishaywe okokuqala kulo mqhudelwano kule sizini, lixetshulwa yiLeicester Tigers yase-England ngo 56-17 eWelford Roard Stadium ngoMgqibelo ntambama.
IVodacom Bulls ishaywe yiNorthampton Saints ngo 30-21 eLoftus Versfeld komunye umdlalo weChampions Cup, iDHL Stormers yaguqiswa yiHarlequins ngo 53-16 eLondon.
I-Emirates Lions yilona lodwa iqembu laseNingizimu Afrika elikwazile ukunqoba e-Europe ngempelasonto, iguqisa iPau yaseFrance ngo 43-35 kowe-Challenge Cup e-Emirates Airline Park, eGoli. IToyota Cheetahs ishaywe yiCardiff ngo 26-10 eWales emqhudelwaneni ofanayo.
ISharks ibivule iChampions Cup ngokunqoba elinye iqembu lase-England, i-Exeter Chiefs, ekhaya. Ilibangise eLeicester bengekho abanye abadlali abasemqoka njengoSiya Kolisi, Eben Etzebeth nabanye.
“Bengifuna ukuletha iqembu lethu eliqinile lizodlala kule nkundla. Ngiyaqonda ukuthi kungani abalandeli bengagculisekanga. Bengifisa ukuthi siyishaye iLeicester phambi kwabalandeli bayo,” kusho uPlumtree.
“Kodwa eqinisweni wumsebenzi wethu ukuthi sibanakekele laba badlali ngoba abawona amarobhothi. Ngeke bakwazi ukudlala masonto wonke kodwa njengamanje abadlali baseNingizimu Afrika baphathiswa okwamarobhothi.
“Ngokubona kwami abahleli bengalubhekisisia lolu daba, bazibuze ukuthi kungani bethumela iqembu phesheya ukuthi liyodlala umdlalo owodwa. Sifike ngoLwesithathu, sadlala ngoMgqibelo, sekufanele sibuyele ekhaya. Mhlawumbe kufanele size lapha sazi ukuthi sizohlala okungenani amasonto amabili.”
ISharks isizolungiselela umdlalo we-United Rugby Championship lapho izobhekana khona neVodacom Bulls eHollywoodbets Kings Park ngoMgqibelo ngo-6 ntambama.
Khonamanjalo, leli qembu liphinde ladalula ukuthi lelule izinkontileka zabadlali abathize. U-Ox Nche, Vincent Tshituka no-Ethan Hooker bakubadlali asebezinzile eqenjini elikhulu abaphinde bazibophezela ukuthi bazohlala kulona amasizini amabili noma amathathu azayo. Abanye abadlali abanwebe izinkontileka zabo nguBradley Davids, Jannes Potgieter noNick Hatton.