UKUGUBHA iminyaka ewu-35 kweSpar KZN Woman’s 10/5km Race kuvulele abagijimi abaqavile nabenzela ukunciphisa "amafutha" amathuba ngemiklomelo eyahlukene econsisa amathe ngosuku lwalo mjaho ongoJuni 22, ngaseHollywoodBets King’s Park Stadium, eThekwini.
Babalelwa ku-400 000 abagijimi besifazane asebegijime lo mjaho kusukela kwaqala ukugijinywa komlenze waseThekwini, ngo-1990.
Ngesikhathi wethulwa ngokusemthethweni muva nje, kumenyezelwe ukuthi kuvulwe izikhala zabafisa ukungenela ezingu-12 000 kusukela maphakathi noMashi kuya phakathi kwamabili ngoJuni 15.
Imininingwane yokungenela egcwele iyatholakala emakhasini alo mjaho ezokuxhumana kanjalo nakwi-website yawo.
Kule minyaka ewu-34 edlule, iSpar Ladies okuyigama odume ngalo eThekwini namaphethelo, isikhiqize inqwaba yabasubathi abagcine ngokumela iNingizimu Afrika emiqhudelwaneni yezinga lomhlaba.
Phakathi kwabo kugqame amawele akwaPhalula, uLebo noLebohang, noGlenrose Xaba namanje osawugijima.
Emasontweni adlule emlenzeni weSpar Ladies waseKapa ku-10km, uLebo oseneminyaka engu-41 ubudala kusale kancane ukuthi aphule irekhodi lakhe alibeke ngonyaka odlule kulo mjaho ngaphansi kwasebemnkantshubomvu.
Ngaphandle kwentshontsho lika-R185 000 uma sekuhlangene yonke imilenze elibangwa ngabagijimi abaqavile (Spar Grand Prix 10km), laba abagijimela ukuxosha udokotela banethuba lokugoduka nendathane yemiklomelo eyahlukene kodwa oyedwa wabo uzowina iHyundai Exter 1.2 Premium ST ebiza R269 000.
Kwabajaha intshontsho, ozodla umhlanganiso eThekwini uzofaka ephaketheni u-R33 000, ozophuma isibili kube u-R25 000 bese kuthi olala endaweni yesithathu ahlafune u-R20 000.
Ukungenela u-10km noma u-5km kungu-R180. Abanesifiso sokungenela ku-10km kodwa abangenayo inombolo yemvumo (license number) yakwa-Athletic South Africa (ASA) ka-2025 bangayithenga eyesibambiso ngo-R55.
Abafisa ukungenela ngabaningi njengezinkampani kumbe izikole, bavulelekile ukukwenza lokhu kuze kube nguJuni 6.
Bayaziswa abagijimi ukuthi abazofaka izicelo sekudlule isikhathi bazokhokha u-R200 ngosuku abayokwamukela ngalo isikhwama esithakwe ngezidingo zomjaho okuhlanganisa nezikibha.