UKUKHISHWA komunye wabadlali ngekhadi elibomvu umdlalo usanda kuqala kube nomthelela omkhulu ekutheni iSharks igcine iqunjwe phansi yiCardiff ngo 36-14 emdlalweni we-United Rugby Championship ngoMgqibelo.
Lona ngumbono womqeqeshi waleli qembu laseThekwini, uJohn Plumtree, othe bekungeke kube lula ukuthi iqembu lakhe limelane nelaseWales selishoda.
ISharks ibivele ingene kulo mdlalo ibophele inqwaba yabadlali abangajwayele ukudlala kwazise izethenjwa bese zilibangise phesheya ngawo uMgqibelo ukuyoqinisa amalungiselelo omdlalo wamanqamu eChallenge Cup.
Le ndebe lizoyibanga neqembu lakhona e-England, iGloucester, eTottenham Hotspur Stadium, eLondon, ngoLwesihlanu ngo-9 ebusuku.
Iqembu lasekhaya lizithole lingasaphelele enkundleni ngomzuzu ka-20 ngenxa yokuthi omunye wabadlali baphambili, uTino Mavesere, ukhishwe ngekhadi elibomvu kulandela ukudlalisa kabi uCameron Winnett.
Lokho kuholele ekutheni izivakashi zigcine zinqobile ngama-try ashaywe ngu-Alun Lawrence, Ben Donnell, James Bothma, Willis Halaholo noMason Grady. UBen Thomas uwabeke phakathi ngonyawo ama-conversion amane nephenathi eyodwa.
ISharks iphendule ngama-try amabili ashaywe nguDiego Appollis noCurwin Bosch, nama-conversion amabili akhahlelwe uLionel Cronje noBosch.
“Kusobala ukuthi ikhadi elibomvu libe nomthelela omkhulu emdlalweni. Kukhishwe umdlali omqoka phambili, sangakwazi ukumelana nabo uma sekududulwana kuma-scrum noma kushwitshwa ibhola kuma-lineout,” kusho uPlumtree.
“Kube nzima kakhulu sagcina sesingenelwa ama-try angenasidingo, Bebelinweba kalula igebe noma sithi siyazama ukusondela. Akukho okuningi ebesingakwenza sesidlala ngabadlali abangu-14.”
ISharks isendaweni ka-13 ngamaphuzu angu- 25 emidlalweni engu-17 kwi-URC. Isanomdlalo owodwa wamaqoqo ezowudlala neVodacom Bulls.
Bangu-20 abadlali beSharks abaye eLondon ngaphambi komdlalo wayo neCardiff ngoMgqibelo.
Kulaba abasalile badlala kuzokhethwa abathathu abazogcwalisa izikhala ebhentshini, nabanye abahlanu abazoba yingxenye yamalungiselelo yowamanqamu.
“Ngijabule ngendlela abanye babadlali baphambili abangajwayele ukudlala abenze ngayo (sibhekene neCardiff). UTino udlale kahle ngaphambi kokuthi athole ikhadi elibomvu. Ubezohamba nathi uma sesiya eLondon kodwa-ke ngeke kusenzeka lokho,” kuphetha uPlumtree.