IMIDLALO yeDStv Premiership esalele iKaizer yiyona ezocacisa ngamathuba ayo okukwazi ukushubisa umbango wesicoco nokuzibekisela indawo emqhudelwaneni weCaf Champions League ngokuphela kwale sizini esezihubela sakusha ngayo.
Ukuvunwa kweqembu ngumahluleli ecaleni layo nePremier Soccer League (PSL) muva nje, okube sekulandelwa wukugunyazwa kokubuyela kwabalandeli bebhola ezinkundleni kubukeka kuyikho kanye osekudale imvunge ngamathuba aleli qembu.
Isimemezelo senziwe ngusihlalo wePSL, u-Irvin Khoza, kuleli sonto kwajabula abalandeli bebhola abaningi ezweni lonke.
IChiefs ibe isiveza ukuthi ibisivele iqalile ukwenza amalungiselo selokhu uMengameli Cyril Ramaphosa, ememezele ukuthi izinkundla sezingamumatha abalandeli abangu-50% emidlalweni yeligi. Lokhu kuvezwe nguJessica Motaung oyiMarketing Director yaleli qembu, kuleli sonto.
IChiefs njengamanje esalelwe yimidlalo eyisishiyagalombili ukusonga isizini, isenemidlalo emibili esazobuyela enkundleni, okungoweCape Town City noweLamontville Golden Arrows.
Izingqapheli eziningi zebhola zihumusha ukubuya kwabalandeli bebhola ezinkundleni njengekhubalo eqenjini elaziwa ngokulandelwa yizinkumbi ezweni lonke, nakuba ibukeka ingelula neze imidlalo elisalele.
IChiefs izodudulana neTS Galaxy koweDStv Premiership, eFNB Stadium, eGoli, ngoLwesibili ngo-7.30 ebusuku.
Lona ngomunye wemidlalo ebhekwe ngabomvu ngabaningi ngenxa yomlando owaziwayo phakathi kwala maqembu uma ebhekene.
Empeleni lo mdlalo uthathwa njengowamagqubu kwazise i iTS Galaxy seyaziwa njengeqembu eliwuhlupho kwiChiefs, futhi kuyiyona ekhiphe izingqungqulu zaseSoweto ekuseni, emzuliswaneni weLast 32 yeNedbank Cup.
Womabili amaqembu eza kulo midlalo nje awadinga ngokufanayo amaphuzu, njengoba Amakhosi asesethubeni lokuqeda isizini esendaweni yesibili kwi-log yePremiership uma ekwazile ukubuya namaphuzu emidlalweni ewasalele, kanjalo neThe Rockets esalwa nokuqhela unomphela esishozini sezembe, iwadinga ngokufanayo amaphuzu kulo mdlalo.
Nangemuva kwalo mdlalo ezowudlala neThe Rockets, ngaphandle kwemidlalo yeCape Town City neGolden Arrows, kuyacaca ukuthi imidlalo esalele Amakhosi kayilula neze, ikakhulukazi njengoba isazobhekana namaqembu okubalwa kuwona iSupersport United, iStellenbosch FC, iMarumo Gallants, iMamelodi Sundowns, iSwallows FC.
Nangemuva kwalo mdlalo ezowudlala neThe Rockets, ngaphandle kwemidlalo yeCape Town City neGolden Arrows, kuyacaca ukuthi imidlalo esalele Amakhosi kayilula neze, ikakhulukazi njengoba isazobhekana namaqembu okubalwa kuwona iSupersport United, iStellenbosch FC, iMarumo Gallants, iMamelodi Sundowns, iSwallows FC.
Zimpofana zizoqala ukwemukela abalandeli bazo okokuqala ngo-Ephreli 16, eFNB Stadium, eGoli.Khonamanjalo, iKaizer Chiefs ibuyise amathemba kubalandeli bayo ngokufaka ukushisa embangweni wesicoco seligi ishaya iChippa United ngo 3-1 koweDStv Premiership, obudlalelwa eNelson Mandela Bay Stadium, eGqeberha, izolo ebusuku.
Amagoli eChiefs avalelwe phakathi uSamir Nurkovic, uKeagan Dolly noCole Alexander, kwathi elokubika ekhaya leChippa lashaywa ngu-Ebienveu Eva Nga.