KUZIQINISILE izinsolo zokumiswa kwesikhulu esiphezulu seRoyal AM, uSinky Mnisi, ukungabonakali nangokhalo kwaso esithangamini sabezindaba sokwethulwa kwethimba elisha labaqeqeshi nabadlali, ekomkhulu leqembu eRoyal Ranch, eMgungundlovu, ngoLwesihlanu.
Ngeledlule kuvele izindaba zokumiswa kukaMnisi ngumengameli weqembu, nguShauwn MaMkhize, okuthiwa ubesola uMnisi ngokuthatha izinqumo ngaphandle kokubonisana naye.
Nakuba uMnisi ale waphetha ukuphawula ngokumiswa kwakhe eqenjini ngenkathi ethintwa yiphephandaba ngeledlule kodwa ukungabonakali kwakhe esithangamini sabezindaba, kuqubule imibuzo.
Esithangamini kwethulwe uDaniel “Dance” Malesela no-Abram “Wire” Nteo abaqeqeshi abazosebenzisana noKhabo Zondo ethimbeni labaqeqeshi beqembu.
Kube sekwethulwa nabadlali abathathu abasanda kusayiniswa, okunguPhilani Cele osuka kwiPretoria Callies, uLesvin Stoffels osuka kwiCape Town All Stars noShane Roberts osuka kwiTS Galaxy.
Empeleni uCele noStoffels sebekhuza ibuya kwiRoyal AM kwazise badlalile kuyona phambilini.
UMaMkhize ukucacisile ukuthi uMalesela, uNteo noZondo bazosebenza ngokuhlanganyela beyithimba labaqeqeshi, okusho ukuthi akekho oyiphini lomqeqeshi phakathi kwabo.
Isinyathelo se-AM sibukeka siwukusika iphethini efana ncamashi neyeMamelodi Sundowns nayo enabaqeqeshi abathathu abasebenza ngokuhlanganyela.
“Sibone kufanele ukuthi siqinise ithimba lethu labaqeqeshi ngomqeqeshi onjengoDance Malesela onamagalelo aziwayo ebholeni, esikholwa wukuthi ukusebenzisana kwakhe ngokuhlanganyela nomqeqeshi uKhabo (Zondo) kuzothela izithelo.
“Ukulanda kwethu uMalesela kungenye indlela yokuqhubeka nendlela yokugcina isitayela sethu sokudlala ibhola elihle, njengoba aziwa lo mqeqeshi ngebhola alidlalisayo.
Sibone kufanele futhi nokuthi silande noMthakathi (uNteo) ekutheni naye abuyele ethimbeni labaqeqeshi beqembu.
Sinethemba lokuthi leli thimba labaqeqeshi nalaba badlali esinabo njengamanje esesibasayinisile, bazokwazi ukuyibamba ishisa kule sizini ezayo, ikakhulukazi kwiCaf Confederation Cup,” kusho uMaMkhize, owale waphetha ukuphawula ngezinsolo zokumiswa kukaMnisi.
UMalesela uvumbuka kwi-AM nje usanda kwehlukana neMarumo Gallants ayibeke kowamanqamu eNedbank Cup ngesizini edlule futhi uyayazi indlela yeCaf Confederation Cup, kwazise ubeqeqesha iTS Galaxy ngamasizini adlule, idlala kuwo umqhudelwano, waphinde waqeqesha neGallants kuwo umqhudelwano ngesizini edlule.