Mamelodi Sundowns (0) 1
Esperance de Tunis (0) 0
IMAMELODI Sundowns iziphungulele umsebenzi yehlula i-Esperance yaseTunisia emdlalweni womlenze wokuqala we-quarterfinal yeCaf Champions League eLoftus Versfeld Stadium, ePitoli, ngoLwesibili ntambama.
Igoli likaPeter Shalulile alishaye esiwombeni sesibili, liqinisekise ukuthi iSundowns izovakashela i-Esperance kowomlenze wesibili ngoLwesibili isethubeni elihle lokwedlulela kowandulela owamanqamu.
AmaBrazilians asedinga ukudlala ngokulingana ukuze ezodlulela esigabeni akhishwe kusona yiyona i-Esperance ngesizini edlule, isaqeqeshwa nguMiguel Cardoso osengumqeqeshi wawo. Ngokushaya iqembu lakhe lakudala, uCardoso uqophe umlando wokuba ngumqeqeshi wokuqala weSundowns olithele isibhaxu kwiChampions League. Ngaphambi komdlalo wangoLwesibili, iSundowns ibingakaze iyehlule i-Esperance kwiChampions League.
Enkundleni, iSundowns ikhombise zibekwa ukuthi ifuna ukunqoba ngokulawula umdlalo nokwakha amathuba okushaya amagoli. Ibithola isikhathi eside sokuphatha ibhola ngenxa yokuthi i-Esperance ibizihlalele emuva, izama ukugwema ukungenelwa yigoli. Lokhu likwenze kahle esiwombeni sokuqala leli qembu laseTunisia kodwa ngesesibili iSundowns igcine iyitholile intuba. UShalulile uqobele phakathi ibhola elibuyiswe ngekhanda nguJayden Adams ngekhanda likade lisuka kuLucas Ribeiro kwesokudla ngomzuzu ka-54.
UCardoso ozwakalise ukujabula ngendlela abafana bakhe abadlale ngayo esiwombeni sesibili, unengcindezi yokunqoba iChampions League eyagcina ukuqukulwa eChloorkop ngo-2016. Kuyinto eyaziwayo ukuthi ukwehluleka kwakhe ukuletha lesi sicoco kwiSundowns kungamakhela isigcwagcwa kwazise yisona esimqoka kakhulu kuleli qembu. Lokhu kuhlale obala ngesikhathi likhomba indlela uRhulani Mokwena phezu kokuba ewine iligi yeBetway Premiership nendebe ye-African Football League.
Ukushaya igoli ekhaya nokunqoba kowomlenze wokuqala kowe-Esperance, akubuzwa ukuthi kunikeze iSundowns noCardoso ithemba lokwengeza inkanyezi ejezini lamaBrazilians.