ISAZOLITHOLA ithuba lokulwela indawo kwi-Last 16 yeNedbank Cup iRoyal AM nakuba kungakacaci ukuthi izobuyela nini enkundleni.
NgeSonto eledlule, iPremier Soccer League (PSL) idalule ukuthi ithathe isinqumo sokuyimisa imidlalo yaleli qembu ngenxa yokuthi ayiyitholanga incwadi eqinisekisa ukuthi izokwazi ukuqhubeka ngaphandle kwezihibe.
Imidlalo echaphazelekile ngalesi sinqumo kube ngoweBetway Premiership obekumele iThwihli Thwahla iwudlale ne-Orlando Pirates eHarry Gwala Stadium, eMgungundlovu, ngoLwesine olwedlule nowe-Last 32 yeNedbank Cup neMilford FC ngoMsombuluko.
Lokhu kudalwe wukuthi leli qembu lingaphansi kweso lomlawuli, uJaco Venter, oqokwe wumthelisi, iSARS, ukuba aqaphe imali yaleli qembu ngenxa yokuthi umengameli walo, uShauwn “MaMkhize” Mkhize, kubikwa ukuthi ukweleta intela elinganiselwa ku-R40 million.
Ngesikhathi kuqhathwa amaqembu azodudulana kwi-Last 16 yeNedbank Cup izolo ntambama, kuvele ukuthi iqembu elizonqoba phakathi kwe-AM neMilford uma sebedlalile, lizobhekana neSekhukhune United emzuliswaneni olandelayo.
Imidlalo ye-Last 16 kulindeleke ukuthi idlalwe maphakathi nenyanga ezayo kodwa izinsuku, izikhathi nezinkundla okuzodlalelwa kuzona, kusazoqinisekiswa yiPSL ngokuhamba kwesikhathi.
Khonamanjalo: Iqembu elibheke ukunqoba le ndebe okwesithathu kulandelana, i-Orlando Pirates, iqhathwe neBaroka FC ekhaya. IKaizer Chiefs, enejoka lokuqeda ishobolo leminyaka eyisishiyagalolunye ingaqukuli nkomishi, izotholana phezulu neChippa United, bese iMamelodi Sundowns idlale neMpheni Home Defenders.
Imidlalo ye-Last 16 yeNedbank Cup
Durban City v TS Galaxy; Orlando Pirates v Baroka FC; Kaizer Chiefs v Chippa United; Mamelodi Sundowns v Mpheni Home Defenders; Marumo Gallants v AmaZulu FC; Royal AM / Milford FC v Sekhukhune United; Stellenbosch FC v Polokwane City; SuperSport United v Cape Town Spurs