UKUGOBA izimbangi ezinkulu, i-Orlando Pirates, emdlalweni wakhe wokuqala wabakhaya baseSoweto kungazisula izono zomqeqeshi weKaizer Chiefs, uNasreddine Nabi, emehlweni abalandeli beZimpofana.
IChiefs izobhekana nePirates emdlalweni weBetway Premiership eFNB Stadium, eNasrec, ngoMgqibelo ngo-3.30 ntambama.
UNabi ufike kuleli qembu ngaphambi kokuqala kwesizini ka-2024/25 esuka eqenjini laseMorocco, i-AS FAR Rabat.
Abalandeli baMakhosi, osekuphele iminyaka eyisishiyagalolunye belinde isicoco, bese kunesikhathi benxusa iqembu ukuthi liqashe umqeqeshi onomlando wokunqoba izindebe, kanti igama likaNabi belikwabahamba phambili.
UNabi wanqoba isicoco seTanzania Premier League nese-Azam Sports Federation Cup neYoung Africans ngesizini ka-2021/22, wazivikela zombili naleli qembu ngesizini ka-2022/23. Kuyona le sizini waphinde wafaka iYanga kowamanqamu eCaf Confederations Cup.
Ngesizini ka-2023/24 waqeda endaweni yesibili kwiligi yaseMorocco ngesikhathi ecija i-AS FAR.
Selokhu efikile kwiChiefs, usathole imiphumela engugingqigongqo njengoba leli qembu elizinze eNaturena lisanqobe imidlalo eyisithupha, ladlala ngokulingana kwemithathu, lanqotshwa kwemine kwiBetway Premiership.
Le miphumela ilibeke endaweni yesihlanu ngamaphuzu angu-21 emidlalweni engu-14. Lisele ngamaphuzu ayisithupha kwiPirates, esadlale imidlalo engu-11. Iqembu eliqhwakele, iMamelodi Sundowns, elisadlale imidlalo engu-12, ishiya iChiefs ngamaphuzu angu-12.
UNabi usevele uphunyukwe isicoco kule sizini okuyiCarling Knockout akhishwe kuyona yiMamelodi Sundowns kuma-quarterfinal..
Uma engaqinisekisa ukuthi Amakhosi aphuma nawo ephelele amaphuzu eFNB Stadium ngoMgqibelo, ngeke anciphise igebe kuphela phakathi kweqembu lakhe nalawa aphezulu kwi-log kodwa kunganika abalandeli into abangaqhosha ngayo kuze kube lawa maqembu ayahlangana futhi kule sizini ngoMeyi.
Umqeqeshi wePirates, uJose Riveiro, wafikiswa kabuhlungu kweyabakhaya ngesizini ka-2022/23 njengoba Amakhosi ayinqoba yomibili ngo 1-0.
Nokho, uvuke wazithatha ngesizini edlule wayinqoba kabili iChiefs.
Umdlalo wokuqala waphela ngo 1-0 wegoli lika-Evidence Makgopa. Kowesibili iPirates yanqoba ngo 3-2. Amagoli eChiefs ashaywa ngu-Ashley du Preez, awePirates abekwa enethini nguMonnapule Saleng (amabili) noThabiso Lebitso.