UMGADLI weVenda FC, uJudas Moseamedi, akangabazi ukuthi leli qembu elisavika izembe okwamanje, ngokuphela kwesizini lizobe libalwa naphezulu kwi-log yeMotsepe Foundation Championship.
UMoseamedi (31) ozakhele igama kumasizini edlule ngokuthwalisa kanzima iKaizer Chiefs esagijima kwiMaritzburg United (esiyaziwa ngeDurban City), ungomunye wabadlali abambalwa abanamava kuleli qembu laseLimpopo, elibalwa navika izembe kwiMotsepe Championship.
Lisendaweni ka-14 kwi-log ngamaphuzu angu-15 ngokulinganayo neCape Town Spurs esendaweni ka-15, kube yiLeruma United ebambe ngangu-13.
Nakuba leli qembu laseVenda lisabalwa navika izembe kodwa likhombisa izimpawu zokuthi lizozibhincisela ngxanye ezinye izimbangi zalo kweminye imidlalo elandelayo ngendlela elidlala ngayo.
Likukhombisile lokho libhekene neDurban City emasontweni amabili edlule, nakuba ligcine liguqa ngo 1-0, eChatsworth Stadium, eThekwini.
“Njengomunye wabadlali abanamava, kungumthwalo wami ukusebenzisa amava enginawo ebholeni elikhokhelayo ngokubambisana nozakwethu abakhona, ukufukula iqembu lisuke kule ndawo elikuyona.
“Ngendlela esidlala ngayo manje, kuyakhombisa ukuthi ukuzethemba kubuyile kubadlali, sesidinga nje ukulungisa amaphutha ambalwa ukuze sikwazi ukunqoba imidlalo,” kusho uMoseamedi, osashaye amagoli amathathu kule sizini.
“Angingabazi ukuthi sizokwazi ukuqeda isizini sibalwa namaqembu ayisishiyagalombili aphezulu kwi-log, ngisho nangaphezulu kwalokho uma ithuba livuma. Eyezembe yona, cha asiyicabangi nhlobo.”
Empeleni iVenda idlala kangcono kakhulu muva nje ngemuva kokuba izintambo zithathwe ngumqeqeshi, uStanford Nkoane, kulandela ukukhonjwa indlela kukaVladislav Heric, ekupheleni kukaDisemba.
Emidlalweni emine uNkoane ethathe izintambo ngoJanuwari, iVenda isinqobe imidlalo emibili - okubalwa nokuxebula iBaroka FC ngo 5-1 - yahlulwa kwemibili.
Ibuyela ensimini ngomdlalo wasekhaya ngoMgqibelo ngo-3.30 ntambama, lapho izokwamukela i-University of Pretoria, eThohoyandou Stadium, eVenda.
Ngakolunye uhlangothi, iCity esaqhwakele kwi-log yeMotsepe Championship nesanda kuzibekisela indawo kuma-quarterfinal eNedbank Cup, izodudulana neBaroka komunye umdlalo obhekwe ngabomvu ngoMgqibelo ngo-3.30 ntambama, eGlobal Stadium, eLebowakgomo.
Imidlalo yeMotsepe Foundation Championship:
Kusasa- Ngo-3.30pm:
Highbury v Milford FC (Gelvandale Stadium)
NgoMgqibelo - Ngo-3.30pm:
Pretoria Callies v Black Leopards (TUT Stadium); Baroka v Durban City (Global Stadium); JDR Stars v Cape Town Spurs (Giant Stadium); Kruger United v Hungry Lions (Kanyamazane Stadium); Venda FC v University of Pretoria (Thohoyandou Stadium)
NgeSonto - Ngo-3.30pm:
Orbit College v Casric Stars (Olympia Park); Upington City v Leruma United (Mxolisi Dicky Jacobs Stadium)