Benin (0) 0
Bafana Bafana (0) 2
IBAFANA Bafana yehlise uvalo kubantu baseNingizimu Afrika ngokuqoqa amaphuzu amathathu emdlalweni kaGroup C wokuhlungela iNdebe yoMhlaba yehlula iBenin ngoLwesibili ebusuku eStade Felix Houphouet-Boingy, e-Ivory Coast.
Amagoli eBafana ashaywe nguLyle Foster noJayden Adams esiwombeni sesibili.
Ngokuwina kwiBenin, iBafana iqhubekile nokuhlala eqhulwini kuGroup C ngamaphuzu angu-13, emuva kwemidlalo eyisithupha. Ivule igebe lamaphuzu ayisihlanu phakathi kwayo neRwanda esendaweni yesibili ngayisishiyagalombili. IRwanda izifake otakwini ngokudlala ngokulingana ngo 1-1 neLesotho ekhaya izolo ebusuku. Kwenzeke okufanayo kwiNigeria ebanjwe yiZimbabwe ngendlela efanayo e-Uyo. Ukuphuma nephuzu kweNigeria esinayisikhombisa, kuyifake otakwini kwazise isiphoqekile ukubhukula emidlalweni emine yokugcina okubalwa kuwona oweBafana ozoba seThekwini, ngo-Okthoba.
Ngaphandle kwamathuba ambalwa ayekwe yiBafana esiwombeni sokuqala kulo mdlalo oqale usuhaqwe umsindo nongabazane, akukho okunye okuthusile okwenzeke kusona.
Kwesesibili, ize yavuleka inkundla ngegoli likaFoster alishaye ngomzuzu ka-53 kulandela umnyakazo omuhle kaFawaaz Basadien kwesokunxele. Kube sengathi iyalikhuphula igiya ngemuva kokungena kwaleli goli iBafana kodwa kudlalwe kwaze kwaba u-Adams, obesanda kungena, uphefumulisa kangcono ezikaHugo Broos ngegoli alishaye ngekhanda ngomzuzu ka-84.
Umdlalo uqale sekubila izisu kubalandeli bebhola kuleli kwazise bekusabalele imibiko yokuthi uTeboho Mokoena bekungafanele adlale ngesikhathi iBafana ibhekene neLesotho emdlalweni ewunqobe ngo 2-0 ngoLwesihlanu olwedlule kwazise ubenamakhadi amabili aphuzi. UMokoena wangena ebhukwini likanompempe ngesikhathi bebhekene neBenin nangesikhathi begadulisana neZimbabwe ngonyaka odlule.
Ngokomthetho weFifa (Rule 63), umdlali othola amakhadi amabili aphuzi kweyokuhlunga ujeziswa ngokweqiwa umdlalo osuke ulandela.
Kucacile nokho kule mithetho ukuthi iLesotho ibinophawini wokukhalaza ngalokhu engakapheli amahora angu-24 kuphele umdlalo.
Ukuphucwa kwamaphuzu okungase kwenzeka uma kuvela ukuthi iLesotho isifakile isimangalo ngesikhathi esifanele, kungase kuphazamise amathuba aleli qembu lesizwe okuzibekisela indawo koweNdebe yoMhlaba ezoba ngonyaka ozayo e-USA, Mexico naseCanada.