UMDLALI wasesiswini kuMsinga United, uNkululeko “Mkhulisi” Miya, usanesifiso sokubuyela kwiBetway Premiership ajike kuyona esedlale imidlalo embalwa kwiRichards Bay FC. kulandela ukubuyela kwakhe esigabeni seSafa ABC Motsepe League ngemuva kwesizini kwesePremiership.
UMiya (24), osebuyele kwiSafa ABC Motsepe League, ngomunye wabadlali abathathu abakhululwe yiBay ngaphambi kokuqala kwesizini okukhona kubona uThabani “Mtswiri” Mthembu noBandile Ndlovu.
Bobathathu babejoyine iBay ngesizini edlule ngemuva kokuthatha amehlo ezinhloli zaleli qembu bedlalela uMsinga United kumaPlay-Offs kazwelonke e-ABC Motsepe League eMgungundlovu ngesizini ka-2022/2023.
“Kukhulu engikufundile ngokudlala kwami kwiRichards Bay noma ngihlale isizini, ngadlala nemidlalo embalwa.
Ukuba seqenjini lebhola elikhokhelayo kuyinto enkulu kunoma yimuphi umdlali okhulayo okuyinto esengilitholile ithuba lokuyizwa. Sengiyawazi umuzwa wokudlala kulesiya sigaba. Sengiyakwazi okudingekayo kumdlali kwiPremiership.
Ngikholwa wukuthi ngiyobe sengingumdlali ongcono kunalona engangisuke nginguyena ngisayinwa yiRichards Bay ngalesiya sikhathi, ngingenalo noluncane ulwazi ngesigaba esikhokhelayo,” kusho uMiya waseMzimkhulu, odlale imidlalo eyisikhombisa ngesizini edlule kwiBay.
“Iminyaka isangivuma, ngakho ngisenethemba lokuthi ngisazolithola elinye ithuba uma nje ngingaqhubeka nokwenza kahle lapha eqenjini lami (uMsinga) engidlala kulona. Noma kungabanga mnandi ukubuyela kwami emuva ngizodlala esigabeni seMotsepe League ngisuka kwiPremiership kodwa ngizizwa ngisekhaya lapha kuMsinga njengoba ngangivele ngihambe kahle. Isifiso sami wukubona leli qembu lami libuyela kuma kumaPlay-Offs njengoba senza kumasizini amabili edlule.”
UMsinga oqeqeshwa nguSmart Ndlovu, usendaweni yesibili kwi-log yeSafa KwaZulu-Natal ABC Motsepe League ngamaphuzu angu-17. Uhlukaniswe ngamaphuzu ayishumi noMkhambathi FC osaqhwakele ngangu-27.
Ubuyela ensimini neDrakensberg FC, eMzisho Stadium, eMsinga ngoMgqibelo ngo-3 ntambama.
Imidlalo yeSafa KZN ABC Motsepe League:
Stream A:
NgoMgqibelo - Ngo-12pm:
Midlands Wanderers v Summerfield Dynamos (Harry Gwala Stadium)
Ngo-1pm:
Mkhumbane Classic v Asanda FC (King Zwelithini Stadium); Ulundi Stadium v Hellenic (Prince Mangosuthu Stadium)
Ngo-3pm:
Umvoti v Durban Pioneers (King Edward Park); Njampela FC v Muzi King Masters (Prince Mangosuthu Stadium)
Stream B:
NgoMgqibelo Ngo-3pm:
Newcastle All Stars v Chess (Arbor Park); UMshwathi United v Ditlou (Wartburg Stadium); Umsinga United v Drakensberg FC (Mzisho Stadium); KwaMashu Durban Knights v Junior Eleven (New Centre); Mkhambathi FC v Ethekwini Coastal FC (Harry Gwala Stadium)