STHEMBISO NGOBESE
UMQEQESHI weBizana Pondo Chiefs, uClinton Larsen, uyifanisa nempi uqobo lwayo imidlalo yabo eyisikhombisa esisele ngaphansi kwesigaba seGladAfrica Championship.
ULarsen ukusho lokhu ngaphambi kokuba ezakhe zingqubuzane nePolokwane City emdlalweni wokubanga amaphuzu ozokuba namuhla ngo-3pm eKing Goodwill Zwelithini Stadium, eMlaza.
Emdlalweni odlule, ezikaLarsen zikwazile ukuthola amaphuzu agcwele njengoba ngempelasonto edlule zihlule iCape Town Spurs ngo-2-1. Lona bekuwudlalo wesine ukuwunqoba selokhu kuqale isizini.
IPondo Chiefs ibambe ibhuleki emsileni we-log yeGladAfrica Championship ngamaphuzu angu-19 emidlalweni engu-23. Nokuyibeka engcupheni yokubuyela kwi-ABC Motsepe League.
Amanye amaqembu angaphephile ezembeni yiSpurs, Cape Town All Stars, Steenburg United, Pretoria Callies nePolokwane City.
Ephawula ngokunqoba umdlalo wakhe wokuqala njengomqeqeshi wePondo Chiefs, uLarsen uthe kubuyise ukuzethemba okukhulu kubadlali bakhe.
“Ngemuva kokunqoba umdlalo wethu neSpurs ngempelasonto edlule emva kwesikhathi eside sagcina ukunqoba, lokhu sekubuyise okukhulu ukuzethemba kubadlali bami lapha eqenjini. Umdlandla uphezulu kakhulu ekhempini.
“Njengoba sinqobile kuzomele siqhubeke nakho ukuze sizokwazi ukusindisa iqembu ezembeni elibhekene nalo. Imidlalo yethu eyisikhombisa siyithathisa okwempi uqobo lwayo njengoba kuzofanele sidlalele ukufa nokuphila uma sisafuna ukuzibona sigijima kwiGladAfrica ngesizini ezayo,” usho kanje uLarsen.
Mayelana nokubhekana nePolokwane namuhla, uthe: “Lona ngeke kube ngumdlalo olula neze ngoba womabili amaqembu asengozini yezembe. IPolokwane ibophele abadlali abanesipiliyoni abafana noTlolane (Puleng), uNene (Mthokozisi), uMvelase (Mpho) noPelembe (Ellias), ngakho-ke kuzomele nakanjani siyiqaphele kulo mdlalo. Kodwa nakuba kunjalo, nginethemba elikhulu lokuthi sizokwazi ukuqoqa amaphuzu agcwele.”
Amanye amaqembu iPondo Chiefs esazodlala nawo ilwele amaphuzu, iFree State Stars, Jomo Cosmos, All Stars, uThongathi, iPolokwane abazophinda nayo.
Imidlalo yeGladAfrica Championship:
Namuhla - Ngo 3pm: Pretoria Callies v Free State Stars (Bidvest Stadium); Royal AM v Richards Bay (Chatsworth Stadium); Bizana Pondo Chiefs v Polokwane City (King Zwelithini Stadium); Cape Town All Stars v Cape Town Spurs (Parow Park).