KUBHEDE abadlali sebethenjiswe amabhonasi aconsisa amathe kwiBlack Leopards egawulwe yizembe kwiDStv Premiership.
Emuva kwemidlalo yangoLwesithathu ebusuku, kuqinisekisiwe ukuthi iLeopards izobuyela kwiGladAfrica Championship isasalelwe wumdlalo esigabeni esikhulu. Isipikili sokugcina kwiLidoda Duvha sishayelwe yiCape Town City iyixebula ngo-3-1 emdlalweni weligi eKapa.
Kwenzeka lokhu nje kade kuvele ukuthi izikhulu zeLeopards besezizidelile, zathembisa abadlali izizumbulu zemali uma bephumelele ukuvika izembe.
Ukuhamba kwaleli qembu, kukhulule inqwaba yamaqembu abezongena enkundleni kubanjwe umoya emidlalweni yokugcina ngoMgqibelo.
Kuyiwe emidlalweni yayizolo, iLeopards idinga ukuwina noma yikanjani ukuze izibeke ethubeni lokuvika izembe. Ukusinda kwayo kade kuncike nasemphumeleni womdlalo phakathi kweChippa United neTshakhuma Tsha Madzivhandila (TTM) uma ibiphumelela ukucosha amaphuzu amathathu.
Esiwombeni sokuqala iLeopards kade ihamba phambili ngegoli lika-Isaac Masia. Ngaleso sikhathi, izimbangi iChippa kade ibambene neTTM kodwa iChilli Boys isidlala ngabadlali abangu-10 kulandela ukuthola ikhadi elibomvu kukaNyiko Mobbie.
Imiphumela yesikhathi sekhefu kade isidonsele obhukwini neStellenbosch, Maritzburg United neChippa.
Nokho esiwombeni sesibili kushabalale amaphupho kwiLeopards ngesikhathi uFagrie Lakay no-Abdul Ajagun beshayela iCity amagoli amabili ngomzuzu ka-57 noka-60. u-Ajagun ubuye nelesithathu umdlalo usuyophela.
Sekungokwesithathu iLeopards igawulwa yizembe kwiPremiership. Njengoba ihambe izolo, yayikade ibuye-ngo-2018. Ngesizini edlule ijike emidlalweni yokuhlunga, ihlula amaqembu aqhumuka kwiGladAfrica.
Emidlalweni yangempelasonto, sekuzocaca ukuthi iliphi iqembu elizoya kweyokuhlunga, kwiChippa United, TTM, Stellenbosch neMaritzburg United.
Imiphumela yeDStv Premiership:
Stellenbosch 0-0 TS Galaxy; Tshakhuma 0-0 Chippa United; Cape Town City 3-1 Black Leopards; SuperSport United 2-0 Maritzburg United; AmaZulu 1-0 Swallows; Baroka 1-2 Orlando Pirates; Kaizer Chiefs 3-2 Lamontville Golden Arrows; Bloemfontein Celtic 0-2 Mamelodi Sundowns.