KUTHATHE amahora angaphansi kwamane ukuthi adayiswe aphele amathikithi omdlalo wamanqamu weMTN 8 ophakathi kwe-Orlando Pirates neStellenbosch FC ngo-Okthoba 5, ngo-6 ntambama, eMoses Mbhida Stadium, eThekwini.
IPremier Soccer League imemezele izolo, ngo-10.30 ekuseni, ukuthi aseqalile ukutholakala e-Ticket Pro amathikithi, abebiza u-R100, kuthe sekushaye u-2.30 ntambama, yabuya le nhlangano yebhola elikhokhelayo isiveza ukuthi asedayiswe wonke aphela.
“Sizobamba isithangami sabezindaba maduze ukucacisa ngezinhlelo zezokuphepha, ezokunandisa nokunye okuthinta ukuhlelwa komdlalo,” kusho iPSL esitatimendeni.
IPirates idlule kwiCape Town City ngo 3-1 emilenzeni emibili kweyandulela owamanqamu, kwathi iStellies yawashisa ijezi iMamelodi Sundowns ngo 2-0.
Lo mdlalo usho lukhulu kubalandeli beZimnyama njengoba bezobe bebheke ukubona ukuthi iqembu labo liyakwazi yini ukuzifaka emlandweni ngokuvikela lesi sicoco amasizini amathathu kulandelana.
Ngasohlangothini lweStellies, izobe ilwela ukuyinqoba okokuqala le ndebe ehambisana nesamba sika-R10 million kompetha.
Sekuyinto ehlale ilindelekile uma iTheku lithole umdlalo wamanqamu ukuthi amathikithi adayiswe ubuthaphuthaphu.