ISTELLENBOSCH FC iqhubekile nokuqhwakela kwi-log yeDStv Diski Challenge, ixebula AmaZulu FC ngo 3-1 emdlalweni weDStv Diski Challenge obuseChatsworth Stadium ngempelasonto.
Usuthu lubulawe umdlali owake wagijima kulona, uLangelihle Phili, oshaye amagoli amabili kulo mdlalo, elinye laqhamuka kuFaiz Abrahams. Elokubika laMaZulu lishaywe nguBayanda Thabede esiwombeni sesibili.
IStellies iqhwakele ngamaphuzu angu-26 emidlalweni engu-12 kanti Usuthu lusendaweni ka-11 ngamaphuzu angu-10 emidlalweni engu-11.
IMamelodi Sundowns iphinde yafaka ingcindezi eqenjini elizihola phambili inqoba iSuperSport United ngo 2-1 kowabakhaya eDobsonville Stadium.
Amagoli amaBrazilians ashaywe nguThulani Zandamela, elaMatsatsantsa lavalelwa nguThabang Makubo.
AmaSandawana asendaweni yesibili kwi-log ngamaphuzu angu-25 emidlalweni engu-11. ISuperSport, evikela isicoco, isendaweni yesithupha ngamaphuzu angu-19 emidlalweni engu-11.
Izinto zisabheke eceleni eqenjini elisemsileni, iMarumo Gallants, ephinde yabuya ilengise izandla inqotshwa yiMagesi FC ngo 1-0 ngegoli lika-Clement Moshwane.
IGallants isacoshe amaphuzu amathathu emidlalweni engu-11. Isele ngamaphuzu amabili kwiLamontville Golden Arrows.
Elinye iqembu elibuye namaphuzu aphelele ngempelasonto kube yiSekhukhune United, eguqise iPolokwane City ngo 1-0 ngegoli elishaywe nguJordan Marks esiwombeni sokuqala.
ICape Town City neTS Galaxy bacazelane amaphuzu bedlala ngokulingana ngo 2-2, kwenzeka okufanayo nakwiRichards Bay FC ne-Arrows, nabo ababambane ngo 2-2.
Umdlalo obubhekwe ngabomvu obekufanele ube phakathi kwezimbangi zaseSoweto, i-Kaizer Chiefs ne-Orlando Pirates, ugcine ungadlalwanga ngenxa yokuduma kwezulu obekuhambisana nombani.
Imiphumela yemidlalo yeDStv Diski Challenge yangempelasonto: AmaZulu FC 1-3 Stellenbosch FC, Magesi 1-0 Marumo Gallants, SuperSport United 1-2 Mamelodi Sundowns, Cape Town City 2-2 TS Galaxy, Richards Bay FC 2-2 Lamontville Golden Arrows, Polokwane City 0-1 Sekhukhune United.
*Kaizer Chiefs v Orlando Pirates (umdlalo uhlehlisiwe).