AWUQONDENE neSuperSport United kuphela umthetho weMamelodi Sundowns, oke waba sematheni muva nje, onqabela abadlali ebabolekise kwamanye amaqembu ukuba badlale uma iqembu elibabolekile libhekene nayo emidlalweni yePremier Soccer League (PSL).
Lokhu kuhlaluke ngoLwesithathu ekuseni, enkulumweni kasihlalo we-TS Galaxy, uTim Sukazi, obekhuluma ngokuningi okuthinta ibhola laseNingizimu Afrika, kwiNewzroom Afrika.
Sekunesikhathi amehlo ehleli kwiSundowns ngendaba yomthetho ovimba abadlali abasemabhukwini ayo ukuba babhekane nayo.
Indaba yawo iphinde yavuswa wukuvinjwa kweSuperSport ukusebenzisa uRicardo Goss, Grant Margerman noThabang Sibanyoni emasontweni adlule, emidlalweni ebibhekene kuwona neSundowns.
Bobathathu abadlali babolekiswe yiSundowns komkhaya bayo, i-United.
Umqeqeshi we-United, uGavin Hunt wuyena obekhala ngalo mthemtho. URhulani Mokwena, uke wazama ukuvikela iqembu lakhe ngalokhu.
"Awukho umthetho obopha amaqembu ukuba avume imigomo yeSundowns uma kubolekwana ngabadlali, ngakho-ke singakhuluma kuze kome amathe kodwa indaba iphakathi kwamaqembu asuke ehleli phansi ngaleso sikhathi," kusho uMokwena ngemuva koweSundowns neSuperSport weMTN 8.
Okushiwo wuMokwena kufana ncamashi nobekushiwo uSukazi kwithelevishini izolo ekuseni.
USukazi uveze ukuthi isivumelwano sakhe neSundowns, ngoKeletso Makgalwa, sinombandela wokuthi uma kungenzeka ngephutha bamsebenzise bebhekene nayo, bazokhokhiswa uR1 million yize kuyibona (iGalaxy) abamkhokhela lonke iholo lakhe ngenyanga.
"Isivumelwano ngokubolekana abadlali phakathi kwamaqembu, asijulile kangako ngoba kuba yisivumelwano sokubolekana ngesikhathi amaqembu avumelene ngaso, nakho konke okunye okuvumelana ngakho (amaqembu) asuke ebolekana," kusho uSukazi.
"Kunemibandela okuvunyelwana ngayo ngesikhathi iqembu lisacela ukubolekwa umdlali weSundowns, bese kuba yilapho ewubeka khona lo mthetho wayo.“
Akakholwa ukuthi umthetho unobulungiswa yize kungekho muntu oboshiwe ukuthi akavume into angahambisani nayo.
"Ngokwami lokhu kuyabanqinda abadlali ngoba kusuke kuyithuba labo lokukhombisa iSundowns ukuthi yini abangayenzela yona nokuthi bayikhombise ukuthi sebekhule ngokwanele ukuthi sebengabuyiswa.
"Asikho isidingo sokubuka kabi iSundowns ngoba amaqembu avuma azi. Nakithina lo mthetho umile. Akukhona ukuthi ubhekene neSuperSport yodwa. UMakgalwa ngeke adlale uma sesibhekene neSundowns. Asikubonanga kuzoba yinkinga kangakho kithina lokho, ngoba vele ufike sesidlalile neSundowns (kowokuqala weligi). Okusho ukuthi wumdlalo owodwa kuphela lapho ezobe engekho khona. Besidinga umgadli osheshayo, ohlaselayo,“ kusho uSukazi.
Ebuzwa uSukazi ukuthi kungenzekani uma bengamdlalisa uMakgalwa kowe’Downs.
“Lelo kungab yiphutha elibiza u-R1 million. Kwisivumelwano sethu ukhona umbandela ocacile uthi kumele sikhokhe le mali uma singenza lelo ‘phutha’. Ngemuva kokwenza lesi sivumelwano kumele laziswe ithimba labaqeqeshi ukuze nabo bazi ukuthi abamusebenzisi umdlali,” kusho usuka kwiNewzroom Afrika.