Mamelodi Sundowns (2) 2
Mpheni Home Defenders (0) 0
IMamelodi Sundowns izibekisele indawo kuma-quartefinal eNedbank Cup ngokwehlula iMpheni Home Defenders emdlalweni we-Last 16 eLucas Moripe Stadium, ePitoli, ngeSonto ntambama.
Amagoli aweze AmaBrazilians ashaywe nguTashreeq Matthews noBathusi Aubaas esiwombeni sokuqala.
Ngokungena kuma-quarterfinal, iSundowns ijoyine izinkunzi zaseSoweto, iKaizer Chiefs ne-Orlando Pirates, ezifinyelele kulesi sigaba ngemuva kokwehlula iBaroka neChippa United ngokwehlukana. Amanye amaqembu azibekisele indawo kuma-quarterfinal eKe Yona yiDurban City, Marumo Gallants, SuperSport United neStellenbosch. Akukacaci ngelizodlulela phambili phakathi kweRoyal AM, Milford neSekhukhune United.
Amaqembu azodudulana kuma-quarter final azoqhathwa ngoMsombuluko ngo-6 ntambama emcimbini ohlelwe yiPremier Soccer League (PSL) eGoli.
Enkundleni njengoba bekulindelekile, iSundowns iwuqale ngamandla umdlalo yathola amagoli amabili ngaphambi kokuthi ziye ekhefini.
ISundowns iqede lo mdlalo ebibhekene kuwona naleli qembu le-ABC Motsepe League waseLimpopo, ingasaphelele kulandela ukukhishwa ngekhadi elibomvu kukaMatthews.
Umdlalo uqalwe yinqwaba yabadlali abangajwayele ukuthola indawo esikimini esiqala imidlalo. Lokhu kwenze ukuthi amaphasi angahlangani kahle enkundleni.
Nokho kugcine kuhlangene ngesikhathi uMatthews eyishayela igoli ngesithende ngomzuzu wesishiyagalombili. U-Aubaas unamathisele elesibili ngeshodi alishaye esebhokisini ngomzuzu ka-27.
Amathuba awele iMpheni ayiwasebenzisanga. Ishaye ipali seziyela ngasekupheleni kwesiwombe sokuqala kulandela iphutha lika-Aubaas noDenis Onyango obesezintini.
Ayiphelanga imizuzu emibili kwesesibili, uMatthews wakhishwa ngekhadi elibomvu kulandela ukuthola ikhadi lesibili eliphuzi.
Lokhu kukukhuphulile ukuzethemba kwiMpheni, yaqala yahlanganisa amaphasi yize ebegcina ngokungabi yingozi ku-Onyango.
Ngokuqaphela lokhu, umqeqeshi weSundowns uMiguel Cardoso, ufake uPeter Shalulile, Keanu Cupido obebonakala okokuqala edlubhe umfaniswano weSundowns noJayden Adams. Lokhu kunike iSundowns ithuba namandla okupholisa umdlalo sekungene noTeboho Mokoena. Yize iSundowns ibisikhombisa izimpawu zokuqina kodwa iMpheni ibilokhu izame njalo ukuthola elokubika ekhaya kwaze kwaba umdlalo uyaphela.