UHLA lwabadlali abasembangweni weDStv Premiership Goal of the Season lubeka iKaizer Chiefs ethubeni elihle lokuvala isizini ngokusula umlomo ngawo umklomelo.
Okubeka iChiefs ethubeni elihle wukuthi avela kane amagama abadlali bayo abasembangweni wegoli elidle umhlanganiso ngaphansi kweDStv Premiership.
Ayisithupha esewonke amagoli abangayo, amane awo ngawabadlali baMakhosi.
Amabili kwamane ngawentandokazi yabalandeli, uKeagan Dolly, bese kuba ngelesinye isilomo uNkosingiphile Ngcobo, kanjalo noReeve Frosler.
ElikaFrosler igoli likhulu ngoba walishaya bebhekene nezimbangi zegazi, i-Orlando Pirates futhi nakuye liyohlezi lisenhlizweni kwazise wayeqala ukubhakuzisa inethi kulowo mdlalo.
Abanye abasembangweni, nguDeon Hotto wePirates noThabo Matlaba weRoyal AM.
IChiefs ngaphezu kokuqeda isizini incela izithupha ezicocweni, ishweba nendawo kwiConfederation of African Football, iphinde yangalibona elidlalayo emiklomelweni yePSL.
Ngisho nakwiDStv Diski Challenge, umdlali wayo uMduduzi Shabalala ukleliswe nowezimbangi zaMakhosi, okuyiPirates, uBoitumelo Radiopane. Kule sigaba yilabadlali bobabili ababangayo.
URadiopane uphinde wathatha owamagoli amaningi kuyo le ligi.
Maningi amathuba okuthi uDolly awuthathe umklomelo kwazise elinye lamagoli akhe, walishaya benquma iChippa United ngo-Okthoba/Novemba, kwachwaza bonke abalandeli beChiefs kwazise kwakudlalwa ngosuku okugujwa ngalo elukasihlalo weqembu, uKaizer Motaung Snr.
Naphezu kwalokho, abalandeli beChiefs bavele bayamthanda uDolly kwazise ungomunye wabadlali abebegqamile eqenjini kule sizini ebimnyama yize ebeqala ukugqoka ijezi labo.
Kusengenzeka kodwa ukuba baningi kwabadlali beChiefs kanjalo namagoli athinta iqembu labo avotelwayo, kubadlisele ogageni abanye abayizimbangi zabo kulo mklomelo.
Kuvotwa kwi-website yePSL, www.psl.co.za.
Umlandeli ngamunye uvota kanye ngosuku.
Ukuvota kuvalwa ngoLwesihlanu lukaJuni 10, 2022.