UKUZIBUYISA zishisa izinduku kwe-Orlando Pirates inqoba kwiMamelodi Sundowns kube wubufakazi enhliziyweni kaJose Riveiro ukuthi akazikhohlisi ngokuqhubeka nokukholelwa ekutheni akuphelile ngeqembu lakhe embangweni wesicoco seBetway Premiership.
IPirates esele kwiSundowns ngemidlalo emine yeligi, inciphise igebe laba elamaphuzu angu-15 ngeSonto, e-FNB Stadium, eSoweto.
Le wini ka 2-1 yePirates iliqalise phansi iphupho layo ngokudla isicoco kwazise isibalo samaphuzu esele ngaso ingasicisha kakhulu uma ingayinqoba yomine imidlalo esele ngayo kwiSundowns.
Kusemqoka nokho ukukubalula ukuthi iSundowns isasalewe wumdlalo neRoyal AM okungakaziwa ukuthi kuzokwenekani ngamaphuzu ayo kumbe imidlalo esele ngayo.
Nakwesalele iPirates, kukhona nowabakhaya, iKaizer Chiefs, okuyingozi kuyona kwazise akulula ukuqagela iqembu elizonqoba iSoweto Derby.
Ngaphambi komdlalo wangeSonto, abaningi okuhlanganisa nabalandeli bokuqina bePirates, bebekhombisa izimpawu zokukwamukela ukuthi iSundowns isigoduke naso isicoco obekudalwa isibhaxu sika 4-1 iBucs esanda kusithola begcina ukuhlangana.
Inkulumo kaRiveiro ikucacisile ukuthi lo mqeqeshi waseSpain akakaze acabange ngale ndlela. Emuva komdlalo, ukusho sakuqholosha ukuthi basakhona embangweni wesicoco futhi abakaze bacabange ngenye indlela.
IPirates iphuthume leli qembu laseChloorkop ngamagoli amabili kaRelebohile Mofokeng zisuka. Kugcine kuyiwona ewine ngayo njengoba uRiveiro eseqhosha kwabezindaba ngokuthi konke okwenzekile bekuhleliwe.
Elokubika lompetha beligi yaseMzansi amahlandla ayisikhombisa kulandelana, lishaywe uKhuliso Mudau esiwombeni sesibili.
“Le wini kufanele siyisebenzise njengesigxivizo sokukhumbuza nalaba abebesingabaza ukuthi siyiqembu elizimisele ngokuba sembangweni wesicoco kuze kube sekugcineni,” kusho uRiveiro esithangamini nabezindaba.
“Besibhekene nelinye lamaqembu angcono ebholeni lase-Afrika saphumelela ukuliphuthuma ngendlela ebesihlele ngayo ngakho-ke lokhu kufanele kukhumbuze bonke abantu abasekhempini yePirates ukuthi leli qembu liqine ngokwanele futhi linawo amava okulwa neSundowns kuze kube sekugcineni.
“Siyawazi amabibi ethu ngakho-ke sizama konke okusemandleni ukuqinisa amabhowodi abukeka esaxega. Asifuni ukugxila kakhulu ezibalweni okwamanje kepha sizoqinisa ekuqoqeni amaphuzu enkundleni bese kuyazenzekela konke okunye.
“Ngalo mphumela esiwuthole kwiSundowns ngiyazi nalaba badlali abese beqala ukusingabaza bona bazovuka. Uzosivusa sonke lo mphumela weSundowns ngoba siwuthole ngokuwuhlelela saphinda sawusebenzela ngokuzikhandla sindawonye,” kusho uRiveiro.
Womabili la maqembu azobuyela enkundleni ngemidlalo emqoka yama-quarterfinal eCaf Champions League lapho iPirates izobhekana khona neMC Alger yase-Algeria kowomlenze wokuqala ekuhambeni ngo-Ephreli 1.
Ompetha balo mqhudelwano bango-2016 (iSundowns) owabo womlenze wokuqala we-quarterfinal ne-Esperance de Sportiva de Tunis yaseTunisia usekhaya ngosuku olufanayo.