KUGQAME ukuhloniphana phakathi komqeqeshi we-Orlando Pirates, uJose Riveiro, noweKaizer Chiefs, uNasreddine Nabi, izolo ngesikhathi bekhuluma esithamgamini nabezindaba ngaphambi komdlalo weBetway Premiership.
Lo mdlalo okuzobe kungowokuqala wabakhaya baseSoweto selokhu iligi ithole abaxhasi abasha, iBetway, uzodlalelwa eFNB Stadium, eNasrec, kusasa ngo-3.30 ntambama.
Okugqame esithangamini wukuthi uNabi ubephendula imibuzo ngokukhululeka, engasabi nokudedela amancoko. Ngakolunye uhlangothi, uRiveiro ubekugwema ngayo yonke indlela ukukhombisa imizwa yakhe njengenjwayelo.
URiveiro waseSpain umamatheke kancane ngesikhathi uNabi encoma iqembu lakhe ngokumela kahle uMzansi neligi kwiCaf Champions League nangeminye imiphumela emihle eliyitholile kule sizini.
Iqembu likaRiveiro lisendaweni yesibili kwi-log ngamaphuzu angu-27 emidlalweni engu-11. Linqobe eyisishiyagalombili, lashaywa kabili.
Selidlale imidlalo engu-27 uma kuhlanganiswa yonke imiqhudelwano lanqoba kwengu-20, ladlala ngokulingana kwemine, lakhala ngaphansi kwemithathu.
Amakhosi asendaweni yesihlanu kwi-log ngamaphuzu angu-21 emidlalweni engu-14. Ngaphansi kukaNabi, athole amaphuzu aphelele kweyisithupha, adlala ngokulingana kwemithathu, anqotshwa kwemihlanu. Asedlale imidlalo engu-17 kuyona yonke imiqhudelwano, anqoba eyisishiyagalombili, adlala ngokulingana kwemithathu, ashaywa kweyisithupha.
Owakusasa kuzoba ngowokuqala wabakhaya baseSoweto selokhu uNabi ethathe izintambo kwiChiefs. Ngesizini edlule, ekwi-AS FAR yaseMorocco, uyinqobe yomibili eyabakhaya ebhekene neFUS Rabat, ezakhe zidlula ngo 4-1 nango 2-0.
KwiYoung Africans yaseTanzania, ngesizini ka-2021/22 neka-2022/23, wadlala ngokulingana kathathu neSimba SC, wanqotshwa kanye.
Ngesizini ka-2022/23, uRiveiro efika kwiPirates, yamehlula kabili iChiefs kweyeligi, wazibuyisa izinduku ngokuyikhipha kwiNedbank Cup.
Ngesizini edlule uwathathe wonke amaphuzu kwiChiefs, eyishaya ngo 1-0 nango 3-2.
URiveiro uthe: “Abalandeli yibona abenza lo mdlalo ubaluleke kakhulu, kanjalo nomlando wawo womabili amaqembu. Akusho lutho ukuthi umdlalo womkhumulajezi, oweligi, noma ngabe sidlalela isamishi. Kumele sigxile kakhulu ekutheni sizobe sidlalela amaphuzu amathathu. Ukubhiyoza kuzokwenzeka ngaphandle kwenkundla nalapho abalandeli behlala khona uma bebuka umdlalo. Siyethemba ukuthi yithina esizojabula nabalandeli bethu uma umdlalo usuphelile. Ngilindele umdlalo osezingeni eliphezulu. Ngicabanga ukuthi iChiefs idlala kahle kakhulu kule sizini, indawo ekuyona ayisivezi kahle isithombe sokuthi idlala kangakanani. Yakha inqwaba yamathuba emidlalweni.”
UNabi wenanele ngokuthi: “Sengibe yingxenye yemidlalo ehlukene yabakhaya emaqenjini esengiwaqeqeshile kodwa angingabazi ukuthi lona wabakhaya baseSoweto wehlukile, ungeqhathaniswe neminye. Lona wumdlalo wabakhaya ohamba phambili kakhulu kwesengike ngaba yingxenye yayo e-Afrika. Unomlando ojulile phakathi kwawo womabili amaqembu. Mina nethimba lami labaqeqeshi, nabadlali, simagange kakhulu ngokuya kulo mdlalo. Nakuba iPirates idlala kahle, kodwa umlando uyakuveza ukuthi ukuba sefomini kweqembu akusho lutho emdlalweni walolu hlobo, wabakhaya. Yikhona okusinika ithemba lokungena enkundleni senze kahle kulo mdlalo.”