UMQEQESHI weKingdom Stars, uPrecious Mthembu, uthi bazozibamba ziqine kwiTelkom National League (TNL) kulandela ukungenzi kahle kwaleli qembu ngesizini edlule kule ligi.
UMthembu, obeqeqesha iKingdom Queens ngesizini edlule, uzobe ehola iKingdom Stars kwiTelkom National League ka-2023 ezoqala ngo-Ephreli 27, eNgoako Ramahlodi Sports Complex, eSeshego, eLimpopo. Eyamanqamu izoba sePitoli ngoJuni.
Kwethulwe ngokusemthethweni abadlali bamaqembu amabili aKwaZulu-Natal, iKingdom Queens neKingdom Stars, okuyiwona azomela isifundazwe kule ligi kazwelonke, emcimbini obuseRiverside Hotel, eThekwini, ngoMgqibelo.
"Kusho lukhulu kimi ukunikwa ithuba lokuthi ngihole leli qembu lamaKingdom Stars, okuyiqembu engidlale kulona isikhathi eside eminyakeni edlule.
Okuhle ukuthi iningi labadlali enginabo njengamanje kuleli qembu bengibaqeqesha kwiKingdom Queens ngesizini edlule ngakho-ke bayasiqonda isitayela sami sokuqeqesha," kusho uMthembu, owayeseqenjini leSPAR Proteas kwiWorld Netball Series ngo-2011, e-England.
"Sesikulungele ukuyoyibamba kwiTNL yakulo nyaka. Kuyasithokozisa ukuthi siphinde sithole ithuba lokudlala kulo mqhudelwano nakulo nyaka.
Kubadlali bethu kubaluleke kakhulu kubona ukudlala emqhudelwaneni waleli zinga ngoba kukhulu abakufundayo. Kubanika nethuba lokubonwa ngabaqeqeshi beqembu lesizwe, iSpar Proteas, njengoba neNdebe yoMhlaba isiseduze. Ngikhuluma nje kumanje omunye wabadlali bethu, uThulisile Maduna, ubebiziwe kumaProteas waya ekhempini yakhona ukuyoziqeqesha, njengamanje ukhombisa ukuba ngumdlali ovuthiwe.“
IKingdom Queens izobe iholwa ngumqeqeshi, uMagda du Plessis, ukaputeni kube nguSiphiwe "BlackBerry" Sibisi, kuthi ukaputeni weKingdom Stars kube uPhindile Sithole.
Ukaputeni weKingdom Queens, uSiphiwe, uthe: "Sizimisele kakhulu ngokwenza kahle emqhudelwaneni wakulo nyaka futhi sifundile emaphutheni ethu angonyaka odlule nesizimisele kakhulu ngokuwagwema ngayo yonke indlela. Sifuna ukwenza isifundazwe sethu siziqhenye.“
Amaqembu aseKZN abhekene nenselelo yokuqeda ishobolo lokungasinqobi isicoco seTNL njengoba kusukela ngo-2014 isungulwa kukhonya amaqembu aseGauteng nawaseFree State.
IGauteng Golden Fireball yiyona engompetha abavikela isicoco seTNL, esinqobe ngesizini edlule.