ZIVULWE ngaphandle kwezihibe izikole KwaZulu-Natal emva kwamaholidi asebusika.
Lokhu kuvezwe nguMphathiswa wezeMfundo kulesi sifundazwe, uMnuz Sipho Hlomuka, ngesikhathi ehambele isikole samabanga aphakeme, i- Seatides Combined, oThongathi esacekelwa phansi yisiphepho ngenyanga edlule.
“Ngijabule ukuthi ukufunda kuqale ngaphandle kwezihibe osukwini lokuqala lwekota yesithathu yonyaka wokufunda kusona sonke isifundazwe,” usho kanje.
Ekhuluma nabafundi bakulesi sikole, ugcizelele ukuthi umnyango uyabeseka futhi uzoqinisekisa ukuthi bathola imiphumela emihle ekupheleni konyaka.
Lesi siphepho sigasele ngesikhathi kubhalwa izivivinyo zaphakathi nonyaka okuholele ekutheni ziphazamiseke. Abafundi abenza u-grade 12 kusona kuphoqe ukuthi bayiswe e-Anton Lembede MTS Academy ukuze bangaphazamiseki ezifundweni zabo.
Lesi sikole singesinye sezikole ezacekelwa phansi yisiphepho esashaya kwazwela oThongathi, sashiya nabantu bengenawo amakhaya.
Zevile ku-10 izikole esifundazweni ezicekelwe phansi yilesi siphepho sangenyanga edlule esidlule nemiphefumulo yabangu-11, abayisikhombisa kubona bavela oThongathi kanti abane abaseNquthu, eShowe nakwaHlabisa.
Umnyango uqinisekise ukuthi usuwafakile amagumbi angomahamba nendlwana esikoleni i-Seatides Combined yize ungaphumelanga obala ngohlelo lokufakwa kwalawa magumbi kwezinye izikole ezacekeleka phansi ngenxa yesimo esifanayo.