UMSOLWA oneminyaka engu-29 ubudala uzovela phambi kweMantshi yaseKempton Park ngamacala okushushumbisa izidakamizwa.
Lo msolwa ubanjwe esikhumulweni sezindiza, i-OR Tambo, nezidakamizwa zenani likaR2.15 million.
Ngokombiko wamaphoyisa, umsolwa ubesuka eBrazil.
“Uthathwe abophiko olusesha abantu abangenayo nabaphumayo ezweni ngemuva kokunqatshelwa ukungena kuleli ngaboMnyango wezaseKhaya.
Lolu phiko lube selumsesha nesikhwama sakhe, nokuyilapho okutholakale khona izidakamizwa zohlobo lwe-cocaine zigcwele isikhwama.
Umsolwa ubeseboshwa khona lapho, izidakamizwa afike nazo eziyisisindo esingu-8.6 kilograms zigcinwe ngamaphoyisa njengoba kuqhubeka uphenyo.