SIKHULU isililo kumalungu omphakathi waseDumbe ngemuva kokufa kwezinkomo ezingu-15 zomndeni wakule ndawo okuthiwa zishaywe wumbani ngesikhathi kuhlasela izulu ngeSonto ntambama.
Kuthiwa izinkomo zakwaKhumalo bezisemadlelweni ngesikhathi kuduma izulu kwafa ezingu-15.
Nakuba abakwaKhumalo bebengathandi ukukhuluma kodwa omakhelwane bebebalisa ngokwenzekile. Abanye bebebuza ukuthi kungani uMnyango wezokuBusa nokubambisana neziNdaba zoMdabu ungangeneleli.
IMeya yaseDumbe, uMnuz Majuba Mavuso ohambele umndeni ofelwe yizinkomo, ithe balungisa isimo ukuze kufakwe ingqalasizinda yokunqanda ukuthi izulu lilimaze imfuyo nabantu.
“Sifuna kungenelele uNgqongqoshe uNkk Nomusa Dube-Ncube kulesi simo. Sikhathazekile ngokwenzekile. Sicela ungqongqoshe asifakele ingqalasizinda yokunqanda izulu,” kusho uMavuso.
Izulu lishaye oKhahlamba kwafa imindeni kwaze kwaphoqa ukuba uNgqongqoshe uNomusa Dube-Ncube afake abafana bokunqanda izulu.
FUNDA: Kudume amakhanda befelwa yizinkomo ezidle ushevu
Okhulumela uMnyango wezokuBusa nokuBambisana neziNdaba zoMdabu, uMnuz Lennox Mabaso, uthe uNgqongqoshe uNkk Nomusa Dube-Ncube uphatheke kabi ngokwenzeke eDumbe kodwa uzama ukuxhumana neMeya uMavuso ukuze alusukumele lolu daba.
“Ungqongqoshe uphatheke kabi ngesimo saseDumbe kodwa unethemba lokuhlangana noMavuso ukuze basize imindeni ethintekile,” kusho uMabaso.