UMHLAZIYI wezepolitiki ubona ukungenzi kahle kwe-MK okhethweni lokuchibiyela obelungoLwesithathu, kuyizinkomba zokuthi seliphelile isasasa elaholela ekutheni leli qembu eliholwa owayengumengameli, uMnuz Jacob Zuma, limangaze abantu abaningi ngesikhathi kunokhetho lukazwelonke.
Umhlaziyi wezepolitiki waseNyuvesi yaKwaZulu-Natal, uMnuz Zakhele Ndlovu, uthe abantu abaningi abavotela i-MK okhethweni lwangoMeyi, bayivotela ngoba kwakunesasasa ngeqembu elisha eliholwa owayengumengameli.
I-MK ayizange inqobe ngisho eyodwa i-ward okhethweni lokuchibiyela obeluthe chithi saka kuzwelonke, ngoLwesithathu.
Okhethweni lokuchibiyela obeluKwaZulu-Natal, kuMasipala waseNkosi Mtubatuba, i-MK ikhombise ukwehlelwa ukwesekwa.
Le nhlangano ithole u-13% ngesikhathi kunokhetho lokuchibiyela ku-ward 16.
Ngesikhathi kunokhetho lwangoMeyi i-MK yathola u-36% wamavoti kule ward.
Kugcine kunqoba i-IFP, ebivele iphethe kule ndawo.
UNdlovu uthe uma kuwukhetho lohulumeni basekhaya abantu abayi ngesasasa.
“Abantu bayazi ukuthi isasasa ngeke libasize ngalutho, babheka kakhulu izidingo zabo endaweni. Abantu bafuna ukuhlinzekwa ngamanzi, ugesi, ukusikelwa utshani nokunye. Ingakho abantu bayaye babheke iqembu elinomlando uma bezovota okhethweni lohulumeni basekhaya. Ingakho eMtuba bevotele i-IFP ngoba sebeyayazi.”
UNdlovu uthe enye inkinga ukuthi abantu abamela i-MK okhethweni lokuchibiyela kabaziwa.
“Enye inkinga ukuthi i-MK iyona eyathola amavoti amaningi lapha KwaZulu-Natal ngesikhathi kunokhetho lwangoMeyi, kodwa akuyona ephethe uhulumeni wesifundazwe. Yehluleka ukuheha amanye amaqembu ukuthi asebenzisane nayo. Lokhu kungenza ukuthi umuntu owayekade eyivotelile ngoMeyi, azibuze ukuthi kungani kufanele aqhubeke nokuyivotela uma ingaphethe ekubeni yavotelwa ngobuningi? Bahlulwa ukwenza into elula.”
Uphiko lwentsha kwi-IFP KwaZulu-Natal, i-IFP Youth Brigade, lubonge bonke abavotele i-IFP.
Usihlalo wophiko esifundazweni, uMnuz Mncedisi Maphisa, uthe ukunqoba kwe-IFP kuzoqinisekisa ukuqhubeka kokuhanjiswa kwezidingo.
Okhethweni lokuchibiyela obelukwezinye izifundazwe, i-ANC inqobe ezindaweni eziningi.
Le nhlangano inqobe kuma-ward angu-10 kwangu-12 akuMasipala waseThabazimbi, eLimpopo.
Lo mkhandlu wahlakazwa emva kombango wangaphakathi.
Inhlangano i-Labour Party ne-DA banqobe i-ward iqembu ngalinye kulo mkhandlu.
Okhulumela i-ANC, uNkk Mahlengi Bhengu-Motsiri, uthe ukunqoba kwe-ANC kuma-ward amaningi kukhombisa ukuthi abantu basakholelwa kule nhlangano.