IMENENJA kaMasipala waseMsunduzi, uMnuz Lulamile Mapholoba, ithi iphezu kwezinhlelo zokushintsha isimo salo masipala oyinhlokodolobha yesifundazwe, iKwaZulu-Natal.
UMapholoba ungene kulesi sikhundla ngasekupheleni konyaka owedlule.
Lo masipala usuhlale ngaphansi kweso lomlawuli kusukela ngo-2019 futhi ujwayele ukuba sematheni ngezindaba ezingezinhle.
Ukungahlanzwa kwedolobha, inkohlakalo, ukuhlupha kwamanzi nogesi kungezinye zezikhalazo abantu bakulo mkhandlu abajwayele ukukhononda ngazo.
UMapholoba uthe usembhidlangweni wokukushintsha konke lokhu.
“UMsunduzi uyinhlokodolobha yesifundazwe ngakho kufanele uvuke uzithathe. Lapha sinazo zonke izinhlaka zoMbuso njengoba isiShayamthetho, uhulumeni wesifundazwe nenkantolo enkulu kuzinze lapha. Yingakho kufanele ukuthi uMsunduzi uqale ubukeke njengenhlokodolobha.”
UMapholoba akamusha komasipala njengoba eke waba yimenenja kuMasipala waseGreater Kokstad nowaseMhlathuze.
Le mikhandlu yathola imibiko yomcwaningi mabhuku engenachashaza ngesikhathi isaholwa nguyena.
Uveze ukuthi unamaphupho amakhulu ngoMsunduzi njengoba ethe ufuna ukuthi lo masipala ngomkhulukazi.
Isiphakamiso sokuthi uMsunduzi ube wumasipala omkhulukazi siphambi kwebhodi lokuklanywa kwemingcele yomasipala, iMunicipal Demarcation Board.
“Phakathi kwezinto esifuna ukuzenza sifuna ukuthuthukisa isikhumulo sezindiza. Isikhumulo sezindiza esikhona sincane, amabhanoyi amakhulu awakwazi ukuhlala. Inhlokodolobha kufanele ibe nesikhumulo sezindiza esikhulu.
“Sifuna idolobha liphinde lakhiwe kabusha ngoba idolobha lethu lakhiwa kudala kakhulu. Sifuna ukuthi kube nezindawo ezintsha ezakhiwayo ukuze lizokhula idolobha.”
UMapholoba uthe kunemali engu-R350 million abayitshelekwe yiDevelopment Bank of Southern Africa (DBSA) athe bazoyisebenzisela ukuthuthukisa ingqalasizinda yomkhandlu.
Uveze ukuthi umasipala usenenkinga yokulinyazwa kwengqalasizinda yomasipala nathe kwenziwa abantu abahlala emgwaqweni.
Uthe baphinde babe nenkinga yabantu abazixhumela ugesi namanzi ngendlela engekho emthethweni.
“Amanzi asilahlekelayo maningi kakhulu, kuphinde kube nenkinga yezinyokanyoka.”
UMapholoba uphinde waxwayisa ngokuthi umkhuba wokungakhokhelwa kwezidingo zikamasipala ungawuguqisa ngamadolo umkhandlu.
Uthe isimo asisihle njengoba ekhale ngokuthi udla lubi umkhuba wokungakhokhelwa kwezidingo zikamasipala ikakhulu eMbali, Edendale naseVulindlela.
Ngesikhathi ekhuluma neSolezwe, uMapholoba ubelungiselela ukuyokhuluma nomphakathi waseVulindlela, lapho abeyogqugquzela abantu bakhona ukuthi bakhokhele izinsiza zikamasipala.
“Njengamanje ngiya eVulindlela ngiyotshela abantu bakhona ukuthi asikhokheni sonke. Abantu abangakwazi ukukhokhela izidingo zikamasipala kufanele bakhokhe. Isimo asisihle njengamanje. Lesi simo sidinga ukuthi sisisukumele ngoba esikhathini esizayo singawuguqisa ngamadolo umasipala. Kuyingozi ukuba nabantu abaningi kangaka abangazikhokheli izidingo zikamasipala.”