INKAMPANI eyenza amafutha nokunye ukudla, iWillowton Group, isidonse ngendlebe abantu ukuthi bangalokothi bathenge amafutha kubantu abahambe bewadayisa.
Lesi sixwayiso siza emuva kokuthi iWillowton Group imemezele ukuthi kuye kwagqekezwa ewarehouse yayo eseKempton Park, eGauteng, ngoLwesithathu.
Le nkampani yenza imikhiqizo okubalwa kuyo amafutha abizwa ngeSunfoil, okokugcoba isinkwa, iSunshine D, d’lite nerayisi, i-Allsome.
Kuthiwa amadoda abehlome ngezibhamu akhombe abasebenzi ase elayisha amafutha awo-2 litha emalolini amathathu ashaya achitha.
IWillowton Group ivule icala, yakhipha nomehlokaboni kaR100 000 kwabazosiza ngemininingwane ezoholela ekuboshweni kwezigebengu.
NgoLwesine bathe bakwaze ukuthola iloli elilodwa eVanderbijlpark kwaboshwa nabathile.
Bathe basawafuna amaloli amabili namafutha futhi usekhona umehlokaboni kaR100 000 kwabazosiza ukuthi kutholwe amafutha nezigebengu.
Bacele abantu ukuthi bangalokothi bathenge amafutha nenye impahla eyebiwe, bathi abasebenzi balulekwa ngezengqondo.
Abanolwazi ngalesi sigameko noma imininingwane engasiza ekuboshweni kwezigebengu nasekutholweni kwamafutha, bangashayela u-082 888 7813.