UMZWILILI emculweni we-opera odabuka eSikhawini, uSiphokazi "Nonzwakazi" Maphumulo, uthole ingqayizivele yethuba lokuyoqhakambisa amagalelo oMntwana uMagogo Buthelezi kwi-14th International Cultural Festival of Symphonic Music, eBoualem Nessaih Opera House of Algiers e-Algeria, ngo-Ephreli 17.
UNonzwakazi ozobe ehambisana neMzansi National Philharmonic Orchestra kule ndumezulu yomcimbi, uzobe ecula izingoma azicaphune emsebenzini womqambi wakuleli, uSolwazi Mzilikazi Khumalo ayeqhakambisa ngawo umlando woMntwana uMagogo, ongunina womsunguli weNkatha Freedom Party, uDkt Mangosuthu Buthelezi.
Uthe uzobuye ahlabelele nezinye izingoma zombhali, uHendrik Hofmeyr, ezisemsebenzini wakhe othi Of Darkness And The Heart.
"Ngizobuye ngicule namanye amanoni adume umhlaba wonke aseMzansi Afrika. Leli dili lomculo lizobe ligubha umculo wezimfijoli wamazwe ahlukahlukene futhi libungaza nabaculi be-classical music."
Phakathi kwabaculi abazobe beshiyelana inkundla noNonzwakazi kubalwa nabaseMexico, Denmark, South Korea, South Africa, Japan, Angola,Germany, Czech Republic, Poland, Russia, Italy nase-Austria.
Kuzobe kungekhona okokuqala uNonzwakazi eshiya izithameli zisahalela impinda emazweni angaphandle.
Lo mculi usebuya konandisa ngomculo we-classic nowe-Afro pop emicimbini emikhulu, eminye yawo ebibanjelwa emadolobheni anjengoParis (France), Tel Aviv (Israel), Dubai (United Arab Emirates) nakwamanye amazwe.
Injabulo ingenhla kuNonzwakazi njengoba eqokiwe ukuthi ayomela iNingizimu Afrika kulo mcimbi, futhi uyathembisa ukuthi uzolimela kahle izwe.
“Leli thuba kuzoba lingamanye azophakamisa igama nomsebenzi wami. Yingakho ngisebenza ngokukhulu ukuzikhandla ngoba ngiyakuqonda ukuthi ngizobe ngingazimele mina kodwa ngimele uMzansi wonke. Uvalo lukhona, kodwa futhi ngijabule kakhulu. Ngiyabonga kakhulu kwiMzansi National Philharmonic Orchestra ngokubona kungifanele ukuthi ngenze umsebenzi omkhulu kangaka.”