NGEMUVA kwehora leshuminanye ekuseni abezimo eziphuthumayo bakwa-ALS babizelwe engozini enyantisayo eyenzeke ku-R102 eSiphingo, eNingizimu yeTheku lapho abathole khona isibhicongo njengoba bathole ukuthi kushayisane izimoto ezimbili neloli, imoto eyodwa iphaphalaze yaphuma emgwaqweni neloli laphaphalaza laqonda ehlathini.
"Kutholakale abantu ababili bevaleleke emotweni eyodwa, ngeshwa umgibeli wesilisa oseminyakeni yo-30 ubeseshonile ngenxa yokulimala kabi."
Kudingeke ukuba kubizwe indiza enophephela emhlani ukuze kuhlengwe futhi kuphuthunyiswe esibhedlela omunye wesilisa obelimele kakhulu. Ababili abebeselolini bathole imihuzuku emincane nabo baphuthunyiswe esibhedlela esiseduze.