LUNGILE MAJOKA
I THEMBA alibulali, ngeke siliphonse ithawula, ngamazwi asefana nesinkwa semihla ngemihla ekhempini yaMaZulu FC abhekene nesimo esinzima sokuzama ukubalekela ukuphonseka eweni njengoba eyibambe emsileni ku-log ye-Absa Premiership.
Abanye kungenzeka ukuthi sebehlanze ngedela ngoSuthu kwazise esikhundleni sokuthi kube khona izimpawu zokuthi lingakwazi ukunyuka endaweni elihleli kuyona, kwanda izinkinga.
Ngesikhathi kubuywa ekhefini AmaZulu adlale ne-Orlando Pirates eMoses Mabhida Stadium, eThekwini, ahlulwa ngo 2-1. Kuyona le nkundla namuhla azokwamukela iMamelodi Sundowns ngo-7.30 ebusuku. ISundowns ihleli endaweni yesithathu ku-log, ukuwina kuzosho ukunciphisa igebe phakathi kwayo neKaizer Chiefs esesicongweni ngamaphuzu angu-47.
Ngemuva komdlalo wePirates, Usuthu luvakashele iBloemfontein Celtic laguqa ngo 3-0. Kuwona lowo mdlalo kukhishwe ngekhadi elibomvu uMbulelo “OJ” Mabizela, ozobe engekho emdlalweni weSundowns.
Ukungabi khona kukaMabizela kuzohlangana nokushiywa nguCarlington Nyadombo obengukaputeni osehambile eqenjini kulandela izinsolo zokuloya.
Ukungabi khona kwalaba badlali kushiya imbobo emuva, umqeqeshi uSteve Barker sekuzomele abambe ayeke ngabadlali abangayijwayele, uRobyn Johannes noSedate Akoriko okuyibona abebeyidlala emdlalweni weNedbank Cup abahlulwe kuwo iLamontville Golden Arrows ngempelasonto.
Embangweni we-Absa Premiership kuhlezi kuzoba khona amaqembu azolwela ukuvika izembe. Okwenza kube wumqansa okwaMaZulu wukuthi asanqobe umdlalo owodwa kwengu-18, likhulu igebe elikhona phakathi kwawo namanye amaqembu angase azithole egijima ku-National First Division (NFD) uma engashintshi ukuqalaza.
Ahlukaniswe amaphuzu ayisishiyagalolunye nePlatinum Stars esendaweni yesibili ukusuka emsileni.
Kukho konke lokhu kuxakaniseka umdlali osewasebenzele iminyaka AmaZulu, u-Ayanda Dlamini, akayingeni eyokufaka emqondweni eyokugawulwa yizembe.
“Ngeke sililahle ithemba manje, kungaba yiphutha elikhulu lokho. Kumele siqhubeke nokuzimisela ngoba ngokwami ithemba lisekhona,” kusho uDlamini.
Umdlalo weSundowns uzolandelwa oweSuperSport United ngeSonto. NgoMashi 7 AmaZulu azovakashela iMpumalanga Black Aces ngaphambi kokubuya azokwamukela iBidvest Wits ngoMashi 10.
“Inzima yona le midlalo kodwa ngeke kusisize ukugxila kulokho. Okusemqoka wukuthi silwele ukunqoba imidlalo elandelayo. Kuzomele silwe ngoba yithina esaziyo ukuthi impilo incike emiphumeleni esizoyithola. Kumele sizame ukunqoba kuqala ngawo umdlalo weSundowns. Uma sithola iphuzu sizolamuleka kodwa sonke siyazi ukuthi amaphuzu amathathu yiwona azocacisa ukuthi siyakwazi yini ukuvala igebe,” kusho uDlamini.
Uthe ngeke kubasize ukulibala izinto ezenzeka emaceleni, kumele bagxile ekulweleni ukuvika izembe.