LISHESHE laguqiswa ngoLwesihlanu icala lokubulawa kukanozinti we-Orlando Pirates neBafana Bafana, uSenzo Meyiwa eliqulwa eNkantolo eNkulu ePitoli. UMeyiwa wadutshulwa wabulawa ekubo kwentombi yakhe uKelly Khumalo eVosloorus, eKurhuleni ngo-2014.
Ukuqulwa kwecala kuvame ukuqala ngehora leshumi ekuseni kuze kuphele ngelesithathu ntambama kodwa ngoLwesihlanu liguqiswe ngehora leshumi nambili emini.
Lokhu kwenzeke ngokwesicelo sikammeli wabamangalelwa abane uMnuz Timothy Thobane, othe ucela isikhathi esanele namakhasimende akhe kukhona asafuna ukukudingida nawo athole eminye imiyalelo. Liguqa nje bekukade kulalelwe ubufakazi bukaMnuz Tumelo Madlala owayengumngani kaSenzo Meyiwa nowayekhona ngelanga lesigameko endlini.
UMadlala uphekwe ngemibuzo enzima wuThobane no-Advocate Zandile Mshololo omele ummangalelwa wesihlanu. kwehlukane imibono ngokuziphatha kukaMadlala njengoba abantu ezinkundleni zokuxhumana bebemgxeka. Kulindeleke ukuthi icala libuyele enkantolo ngoMsombuluko lapho lizoqhubeka nokuqulwa.