BAZOMENYEZELWA ngoMgqibelo abaholi abaphezulu abakhethwe engqungqutheleni ye-ANC eqala kusasa eNasrec eGoli njengoba kuzophakanyiswa amagama abo khona kusasa ebusuku.
Ngokohlelo lwale ngqungquthela, abaholi abaphezulu okubalwa uMengameli, iPhini lakhe, uSihlalo kazwelonke, uNobhala jikelele, iPhini likanobhala jikelele nomgcinimafa, bazovotelwa ngoMqibelo ekuseni.
Bazobe sebemenyezelwa ngabo-10 ebusuku.
Ngokwalolu hlelo, kuzobe kushetshwa ivoti kube kuqhubeka namakhomishini ahlukene.
Uhlelo lokumemezela abakhethiwe luzobe luvulelekile.
Ngokohlelo amalungu engeziwe azophakanyiswa ngawo uMgqibelo bese evotelwa kusuka ngeSonto.
NgoLwesibili kuzomenyezelwa abakhethelwe esigungwini esiphezulu sale nhlangano.
Okunye okubhekwe kule ngqungquthela indaba yesikhundla sephini lesibili likaNobhala jikelele elizosiza lehlise umsebenzi obhekene nonobhala nephini lakhe eLuthuli House.
UMengameli Cyril Ramaphosa kulindeleke ukuthi abhekane noDkt Zweli Mkhize kwesokuhola inhlangano.