KUVELE ukuthi ngunobhala we-ANC egatsheni eliku-Ward 8, kuMasipala waseMshwathi ngaphansi kwesiFunda iMoses Mabhida, uMnuz Thabo Madonsela, oshonile kwalimala abantu-14, ngesikhathi kushayisana imoto encane netekisi KwaSwayimane, eWartburg, ngoLwesibili.
Okhulumela abezimo eziphuthumayo i-ER24, uRussel Meiring, uthe bafike kule ndawo bathola itekisi nemoto kusohlangothini olulodwa lomgwaqo.
“Abantu abaningi bebehleli eduze kwalezi zimoto. Bangu-14 abahlolelwe endaweni yesigameko baphuthunyiswa ezibhedlela belimele ngokwahlukana,” kusho yena.
Abe-ANC kulesi sifunda bathathele ezinkundleni zokuxhumana bedlulisa amazwi enduduzo emndenini kaMadonsela.
