OWESIFAZANE obeyosiza ingane kamakhelwane ebikhala uqanduqandu okusolakala ukuthi ishiywe unina obeyophuza, uhlangabezane nembibizane ngenkathi ebuya izingane zakhe ezimbili sezishe nomjondolo zashona.
Kusolwa ukuthi kuwe ikhandlela lokhela impahla ebisendlini kulesi sigameko okubikwa ukuthi senzeke emijondolo yaKwaGonokwakhe, eCrammond, ngaseMgungundlovu, ngeSonto, ngo-11 ebusuku.
Unina wezingane ezishonile uNksz Zandile Mdushane (29), uthe ushiye izingane zakhe uWandile (3) no-Oluhle Mdushane (1) zilele ephuthuma ingane kamakhelwane wakhe ebizwakala ikhala ingaphezi.
“Bengikhanyise ikhandlela ngizitshela ukuthi ngizosheshe ngibuye ngoba ngizwa ingane kamakhelwane ikhala kabuhlungu,” kusho uNksz Mdushane.
Efika kwamakhelwane wakhe, uthe ufice ingane (2) iyodwa ikhala isize yaba nesilokozane.
“Ngihambile ngithungatha unina womntwana ebusuku ngaze ngamfica lapho okuphuzwa khona,” kusho uNksz Mdushane.
Uthe ngendlela lona wesifazane abephuze ngayo, ubone kungcono ahambe nayo aye lapho ehlala khona.
“Sengifikile endlini ingane kamakhelwane ayivumanga ukuthula. Ngiphindele endlini lapho engiyithathe khona ngithi ngiyofuna ukudla kwayo,” kusho yena.
Esephindela endlini uthe ubone ngelangabi lomlilo emjondolo wakhe seliphezulu.
“Ngiphuthume khona ngazama ukuziphonsa phakathi elangabini ngabanjwa omakhelwane,” echaza.
Uthe usola ukuthi ikhandlela liwile lokhela ezinye izinto ezikhona endlini.
“Ngivamisile ukushiya ikhandlela likhanya kodwa bekungakaze kwenzeke liwe,”usho kanje.
Uthe okwenza basebenzise amakhandlela kule ndawo, wukuthi ugesi abanawo.
Uthe izingane zakhe zishe zaxebuka isikhumba.
“Nakuba ngingavunyelwanga ukuthi ngizibone izingane zami emuva kokutakulwa kwazo emlilweni, sengizwile ukuthi indlela ezishe ngayo, bekusuka isicubu uma uzibamba,” usho njalo.
Uthe kushe yonke into endlini okubalwa okokugqoka nomazisi.
UNksz Thembeka Khumalo osekomitini lomphakathi, uthe baphatheke kabi ngesehlo esenzekile.
“Okubuhlungu wukuthi usizo oluphuthumayo alusheshanga lwafika kulesi sigameko. Bonke bafike sekucekeleke phansi zonke izinto endlini,” kuchaza uNksz Khumalo.
Okhulumela amaphoyisa KwaZulu-Natal, uLt Colonel Thulani Zwane, uthe amaphoyisa aseCrammond aphenya icala kulandela ukusha kwezingane ezimbili zisendlini, eneminyaka emithathu nenonyaka.
“Kusolwa ukuthi ikhandlela elishiywe livutha liwile kwasha,” kusho uZwane.