BAKHALIMA iminyango kahulumeni waKwaZulu-Natal, esaqhubeka nokusaphaza izabelomali. Muva nje, kubikwe ukuthi iminyango kahulumeni wesifundazwe izosebenzisa ngokweqile izabelo zayo ngo-R8 billion.
Amalungu esiShayamthetho athe ukusebenzisa kweminyango ngokweqile izabelo zemali kukhombisa ukungaphathwa ngendlela kwezimali zomphakathi.
Lokhu akusho ngesikhathi kunenkulumo mpikiswano esiShayamthetho, lapho bekubhekwa umbiko wamaphakathi nonyaka wokusetshenziswa kwezimali emnyangweni kahulumeni wesifundazwe.
Umbiko uveze ukuthi uMnyango wezeMpilo uzosebenzisa ngokweqile isabelomali sakulo nyaka ngo-R4.7 billion.
UMnyango wezeMfundo wona uzosebenzisa ngokweqile isabelomali sawo ngo-R2.3 billion.
Ilungu leMK, uMnuz Phumlani Mfeka, lithe iyathusa indlela iminyango ephethe ngayo izimali, lathi bafuna zithathelwe izinyathelo izikhulu eziphatha budedengu izimali zomphakathi.
“Laba bantu bafike bethula isabelomali sabo lapha esiShayamthetho, bese siyaphasiswa. Kuthi uma sebesitholile, bese bengasisebenzisi ngendlela. Akusibona yini ubugebengu lobu? Sifuna aboshwe amaqili ngoba phela akukho qili lazikhotha emhlane.”
UMfeka uthe ezinye izikhulu eziphethe iminyango aziwazi umsebenzi wazo.
“Abanye babo abawuhloniphi umsebenzi, abantu abafuna ukuxoshwa nje.”
Ilungu le-EFF, uMnuz Mongezi Thwala, lithe okubakhathazayo ukuthi azithathelwa izinyathelo izikhulu ezihluleka ukusebenzisa izimali ngendlela.
“Kuyaqhubeka ukungalandelwa kwemithetho kodwa asingaze singezwa kuthiwa kukhona abathathelwe izinyathelo.”
Ilungu le-IFP, uMnuz Satishrai Bhanprakash, lithe iminyango kahulumeni waKwaZulu-Natal kufanele ibophe izifociya.
“Ikakhulukazi ngoba nakhu uMnyango kaMgcinimafa kuzwelonke usushilo ukuthi ayikho imali eyengeziwe ozosinikeza yona. Iminyango kufanele ibeke phambili izinto ezibalulekile.”
Ilungu leDA, uMnuz Tim Brauteseth, lithe kufanele isiphulwe nezimpande zayo inkohlakalo eholela ekubhubhudlweni kwezimali zomphakathi.
UMphathiswa wezezimali, uMnuz Francios Rodgers, uthe bakhathazekile ngokusetshenziswa ngokweqile kwezimali eminyangweni kahulumeni wesifundazwe.
Uthe bazolekelela iminyango owezeMpilo, nowezeMfundo inciphise imali ezoyisebenzisa ngokweqile.
“Ngibe nomhlangano nezikhulu zomnyango wami. Odabeni loMnyango wezeMpilo nowezeMfundo, ngingasho ukuthi kukhona okwenzekayo. Ngingasho ukuthi isinciphile imali okubhekwe ukuthi bayisebenzise ngokweqile. Ngibonga kakhulu kubo bonke abaphathiswa esibambisene nabo, abasebenza ngokuzikhandla, benza isiqiniseko sokuthi uhulumeni wesifundazwe awuguqi ngamadolo.”