KULINDELEKE bagwetshwe namhlanje yiNkantolo eNkulu yaseMgungundlovu, abayisishiyagalombili abalahlwe ngoxhaxha lwamacala okukhona kuwona awokubulala, awokuzama ukubulala, awokukhwabanisa nokuhlela itulo lokubulala, enzeke phakathi kuka-Agasti 2014 noMashi 2016, ehostela eGlebelends, eMlaza.
Laba abalahlwe ngamacala ngo-Okthoba nyakenye ngoBhekukwazi Louis Mdweshu (40) ongummangalelwa wokuqala kuleli cala, obesebenza njengoconstable esiteshini samaphoyisa iDurban Central ngesikhathi eboshwa, Khayelihle Mbuthuma (31) waseHarding, Mbuyiselwa Mkhize (32) waseHighflat, Bongani Mbhele (36) waseMthwalume, Mondli Talente Mthethwa (32) wakwa-J eMlaza, Vukani Manenze Mcobothi (33), Eugene Wonderboy Hlophe (48) noNcomekile Matlale Ntshangase (37) baseGlebelands.
Bonke laba kuthiwa babehlala kuleli hostela ngesikhathi kwenzeka izigameko zokubulawa kwabayisishiyagalolunye okungoMnuz Siniko Ncayiyame, Thulani Kati, Sipho Ndovela, Themba Pina, Nkosinathi Ndovela, William Mthembu, Thokozani Machi, Mzwandile Gawuza noMnuz Lucky Mtwa.
Bayisikhombisa abalimala kulezi zigameko. Ngesikhathi bevela kule nkantolo ngoMsombuluko, omele uMdweshu noMatlale Ntshangase, u-Advocate Martin Krog ethalalisa, unxuse inkantolo ukuthi ibabonelele laba ababili uma seyikhipha isigwebo, eveza ukuthi sebevele sebedonse iminyaka emihlanu besezikhindini, selokhu baboshwa ngo-2017.
UMdweshu ulahlwe ngecala lokwakha itulo lokubulala namane okuzama ukubualala, kwathi uMatlale Ntshangase walahlwa ngamane okuzama ukubulala.
Ngokwamaphepha asenkantolo, bangu-107 abethule ubufakazi kuleli cala.
Kuthiwa laba babephoqa abahlala ehostela ukuthi bakhokhe kubo imali ethile uma kukhona ogoloza ukubambisana nabo kulokho azidonsele amanzi ngomsele.