Kudutshulwe kwabulawa abasolwa abathathu kwatholakala nezibhamu ezimbili eDoringkop, KwaDukuza.
Udaba luqale ngesikhathi amalungu eVala Mgodi ebopha kwabasolwa ababili nokutholwa kwezibhamu ezimbili eSikhaleni, kwatholakala eminye imininingwane kwabeCrime Intelligence ngabasolwa abane abebefunelwa inqwaba yamacala okubulala KwaMsane naseMtubatuba. Imininingwane etholakele ithi abasolwa bebeshayela endaweni yaseDoringkop.
Kulandelwe umkhondo wemoto abebehamba ngayo abasolwa, amaphoyisa aphikelela eDoringkop. Imoto ibonwe ngamaphoyisa eshayela emgwaqeni uDoburg, kuthe uma ezama ukuyimisa abebesemotweni bavulele ngenhlamvu bebhekise emaphoyiseni.
Kuqubuke impi yezibhamu ngesikhathi kudutshulwana abasolwa abathathu bafa, nokho umsolwa oyedwa wabaleka endaweni yesigameko. Kutholwe izibhamu ezimbili ezingekho emthethweni endaweni yesigameko. Uphenyo lwamaphoyisa luveze ukuthi abasolwa bake babamba inkunzi phambilini, bangena emzini wekhehla balishaya baliphuca isibhamu.
Ngenhlanhla ikhehla lisaphila livele namhlanje ngoMgqibelo, 22 March 2025 kanti selivule icala esiteshini samaphoyisa KwaDukuza.