UKUBUMBANA nokubeka impilo engcono nekusasa labafundi phambili yizona zinto ezichazwe ngokuthi yizo ezibe wukhiye wempumelelo yabafundi baka-matric wanyakenye waseMenzi High School, eMlaza, beqhubeka nokubeka lesi sikole ebalazweni ngokuhlale beshaya into yamehlo kwabebanga lokugcina.
Lokho kushiwo wuthishanhloko wakulesi sikole, uNkk Nozipho Ndlanya, ekhuluma emcimbini wokuklomelisa ongqeqe bakulesi sikole abawu-39, abaqwaqwade emakhanda abafundi abebefunda u-matric kule sikole esaziwa ngomlando weminyaka engaphezu kwewu-10 yokuhlale kuphasa wonke umfundi ka-matric khona.
Laba bafundi abawu-39 bahlanganiswe e-ICC, eThekwini, ngoLwesihlanu, baklonyeliswa ngama-laptop noR1 000 umfundi ngamunye, okuyindlela yokubahlonipha ngokuphasa kwabo ngezinga eliphezulu kangangokuthi bonke banemiphumela engaphezu kuka-80% uma kuhlanganiswa amamaki ezifundo zabo, nokuthi kubona bonke akekho ophase ngamalengiso izifundo ezingaphansi kwezine.
Ekhuluma kulo mcimbi waminyaka yonke, obuwenziwe inhlandla lesishiyagalolunye kulo nyaka, uNkk Ndlanya uthe impumelelo enjena iwumvuzo wokuzikhandla kothisha, umphakathi ingxenye yawo enkulu okungeyaseMlaza, nokuzikhandla kwabafundi baka-matric.
“Okuhle kakhulu ngokuhlangana kwethu ukujabulela esikuzuzile nokuthi asigcini ngokuphasa ngo-100% nje kuphela, kepha cishe u-90% wabafundi baka-matric wanyakenye, baphase ngezinga elivuma nelibabeka emathubeni okuthi bamukelwe ezikhungweni zemfundo ephakeme,” kusho uNkk Ndlanya.
Isekela likaNgqongqoshe weMfundo ePhakeme ezweni, uMnuz Buti Manamela, nalo ebelikhona kulo mcimbi, lithe elikubona kulo mcimbi kudinga ukushayelwa elikhulu ihlombe ikakhulu ngoba izingane ezifunda manje zikhulela ezimeni ezinzima.
“Ngakho le miphumela esihlanganele ukuzoyijabulela kulokhu isiyinselelo kubafundi abafunda u-matric kulo nyaka ukuqhubeka lapho okugcine khona abanyakenye ukuze umsebenzi omuhle owenziwe yisikole uhlale umile njalo,” kusho uManamela.
Omunye futhi obeyisimenywa esiqavile emcimbini, intandokazi yomculo we-house uZakes Bantwini, ucebise abafundi ukuthi bangavumeli impilo yobukhazikhazi neyokuzimela ukuthi yenze bakhohlwe ngabakusukele emakhaya, beyofunda emanyuvesi.
“Nginicebisa ngokungavumeli lutho namuntu ozoniguqula kulokho enihlele ukukwenza nokukufunda kusukela manje kuya phambili. Lokho ngikwazi ngami njengoba ngenkathi ngisenza izifundo zomculo enyuvesi, baningi ababengingabaza, bezitshela ukuthi ngeke ngifike ndawo ngengikwenzayo,” kusho uZakes.
Kulo mcimbi bekuhlangene abafundi abafunda u-matric eMenzi High nonyaka, othisha bakhona nabakwezinye izikole, nabazali babafundi abawu-39 abebezoklonyeliswa ngokwenza kahle.
Kulaba bafundi abawu-39 abahambe phambili; abawu-10 abaphume phambil ngoYakho Mthembu, Olwethu Ndlela, Aphiwe Njoka, Siyabonga Khawula, Phiwayinkosi Maphumulo, Nontando Mtolo, Thabiso Dlamini, Asanda Mkhonde, Nolwazi Khwela nobaqwaqwade bonke emakhanda uSinenhlanhla Sithole.